Një sasi me speca të kuq të eksportuar drejt Sllovenisë është tërhequr dhe asgjësuar për shkak të niveleve të larta të pesticideve (acetamiprid, formetanate dhe flonicamid), raporton kompania importuese Geaprodukt. Autoritetet kanë këshilluar konsumatorët të kthejnë produktin ose ta heqin nga përdorimi, dhe të kontaktojnë mjekun në rast të problemeve shëndetësore.
Pak ditë më parë, autoritetet kroate raportuan edhe raste të tjera: 4 ton domate nga Berati u asgjësuan pasi përmbanin nivel të lartë të pesticidit chlorfenapyr, pesë herë mbi normën e lejuar, dhe 5 ton pjeshkë nga Divjaka u bllokuan për prezencën e metalit të rëndë nikel.
Mish pule i kontaminuar me salmonelë
18.3 ton fileto pule të importuara nga Brazili rezultuan të kontaminuara me bakterin Salmonella në Portin e Durrësit. 13.1 ton ishin shpërndarë në treg përpara se Autoriteti Kombëtar i Ushqimit (AKU) të njoftonte publikisht.
Ministrja e Bujqësisë, Anila Denaj, tha se AKU e kishte kryer detyrën dhe se tashmë çështja i takonte institucioneve përkatëse, duke hequr përgjegjësinë nga ministria të cilën drejton.
“Situata e AKU është e qartë; agjencia ka kryer detyrën dhe ka realizuar kontrollet e nevojshme. Sigurisht, lajmi është bërë publik, janë konfirmuar përgjigjet e analizave dhe i gjithë zinxhiri i kontrollit, për të cilin AKU ka denoncuar ata që kanë shkelur protokollet. Çështja i takon insitucioneve si krimi ekonomik, policia që duhet të japin gjykimin përkatës”, u shpreh Denaj.
Kompania që importoi mishin e pulës me salmonelë është ‘AMG Food’, produktet e së cilës në treg gjenden me emrin ‘diMal’. Arben Goxha, pronari i kompanisë ‘AMG Food’ u ndalua një muaj pasi ishte shpallur në kërkim për t’u hetuar më pas në gjendje të lirë.
Skandali është se konsumatorët u njoftua nga AKU 1 javë pas analizave që faktuan prani të salmonelës në mishin e pulës, çka tregonte se një pjesë e mirë e mishit ishte konsumuar nga shqiptarët.
Qumësht me alfatoksinë
Nga 26 mostra të marra gjatë janarit-prillit 2025, 10 rezultuan pozitive për alfatoksinë, një toksinë që rritet tek drithërat dhe gruri.
Rreth 40% e qumështit të kontrolluar tejkalonte normat e sigurisë. Sasia e kontaminuar u tërhoq nga tregu.
Mandarinat me pesticide
Në nëntor dhe dhjetor të vitit të kaluar u zbulua skandali se disa ngarkesa me mandarina nga Shqipëria, ishin kapur nga autoritetet e sigurisë ushqimore në Kroaci me përmbatje pesticidesh të rrezikshme. Sistemi europian i sigurisë ushqimore RASFF raportoi askohe tre raste të ndotjes me mbetje të pesticideve Chlorpyrifos dhe Phosmet në ngarkesa mandarinash me origjinë nga Shqipëria.
Në shkurt të këtij viti u zbulua skandali tjetër i tregtimit të 21 tonëve mandarina që pas eksportimit në Kroaci, u kthyen mbrapsht për shkak se rezultuan me përmbajtje të lartë të pesticidit “Fosmet”. Ky lloj pesticidi është i dëmshëm dhe gjithashtu i ndaluar për tu përdorur. Asokohe lidhur me ngjarjen u arrestuar nga policia tre persona në Berat. Në pranga u vu edhe inspektori i Vetenarisë dhe Mbrojtjes së Bimëve, Elson Tahiraj pasi ai lëshoi certifikatë fitosanitare fiktive.
Speca me pesticide
Ngarkesa e bllokuar e radhës ishte në mars të këtij viti, ku përmes sistemit të alarmeve të shpejta të BE-së (RASFF), u ndaluan në Kroaci speca nga Shqipëria, për shkak se kishin nivele të larta pesticidësh. Specat u klasifikuan me rrezik të lartë për konsumatorin, për shkak të përmbajtjes shumë të lartë të pesticideve. RASFF njoftoi se shqetësimi ishte serioz.
