Inspektori i Lartë i Drejtësisë ka kërkuar këtë të mërkurë marrjen e masës disiplinore “ulje e përkohshme e pagës deri në 40% për një periudhë deri në një vit” ndaj gjyqtarit Shkëlzen Liçaj, i cili ushtron funksionin pranë Gjykatës së Shkallës së Parë, Juridiksioni i Përgjithshëm Sarandë.
Hetimi disiplinor ndaj gjyqtarit Liçaj është bazuar në 13 ankesa për vonesa të theksuara në zbardhjen e vendimeve gjyqësore. Raporti i Inspektoratit të Lartë të Drejtësisë, që bashkon dy procedura të mëparshme, tregon se në disa raste vendimet janë zbardhur me vonesa deri në 4 vite, duke tejkaluar çdo afat të përcaktuar nga ligji.
“Këto vonesa nuk janë raste të izoluara, por përfaqësojnë një sjellje të përsëritur gjatë tre viteve të fundit, në kundërshtim me standardet ligjore dhe profesionale”, thuhet në raportin zyrtar të ILD-së.
Gjyqtari ka paraqitur si argument mbingarkesën në punë dhe problemet strukturore në sistemin gjyqësor, por ILD vlerëson se ai nuk ka përmbushur në mënyrë të qëndrueshme detyrimet e tij ligjore dhe funksionale, duke ndikuar negativisht në besimin e publikut tek drejtësia.
Raporti evidenton se shkeljet kanë sjellë pasoja serioze për palët në proces, përfshirë vonesa në ushtrimin e të drejtës për ankim, si dhe pengesa në ekzekutimin e vendimeve për shkak të moszbardhjes së tyre në kohë.
Edhe pse gjyqtari ka bashkëpunuar gjatë hetimit disiplinor, ILD vlerëson se veprimet dhe mosveprimet e tij përbëjnë “shkelje të rëndë disiplinore”, të përcaktuara në ligjin nr. 96/2016 “Për statusin e gjyqtarëve dhe prokurorëve”.
Për këtë arsye, Inspektori i Lartë i Drejtësisë i ka propozuar Këshillit të Lartë Gjyqësor vendosjen e masës disiplinore “ulje e përkohshme e pagës deri në 40%, për një periudhë jo më të gjatë se një vit”.
