Gjykata e Posaçme e Apelit për Korrupsionin dhe Krimin e Organizuar (GJKKO) ka vendosur sot të rrëzojë ankimimin e inspektorit të Inspektoratit të Mbrojtjes së Territorit (IMT), Klajdi Zhilla, duke e lënë atë në arrest me burg.
Zhilla ishte ndaluar më parë pasi dyshohet se i kishte kërkuar një biznesmeni në zonën e Kombinatit 1 mijë euro për të mos hequr tendën e lokalit që kishte zënë hapësirën publike.
Sipas vendimit të GJKKO-së, gjyqtare Igerta Hysi ka miratuar masën e sigurisë të vendosur më parë nga Gjykata e Posaçme e Shkallës së Parë për Korrupsionin dhe Krimin e Organizuar, duke vërtetuar ligjshmërinë e ndalimit dhe caktimit të arrestit me burg.
Njoftimi i GJKKO:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Igerta Hysi, sot më 30.09.2025, shpalli vendimin mbi çështjen penale nr. 67 akti, datë 22.09.2025 regjistrimi, mbi ankimin e personit nën hetim Klajdi Zhilla, me objekt: “Ankim ndaj vendimit nr. 89, datë 01.09.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Vleftësimin e ligjshëm të ndalimit dhe caktimin e masës së sigurimit personal “Arresti në burg”, parashikuar nga neni 238, i Kodit të Procedurës Penale” dhe vendosi:
– Miratimin e Vendimit nr. 89, datë 01.09.2025 të Gjykatës së Posaçme të Shkallës së Parë për Korrupsionin e Krimin e Organizuar.
– Kundër këtij vendimi mund të bëhet rekurs në Gjykatën e Lartë brenda 45 ditëve, nga e nesërmja e njoftimit të vendimit.
