Në Dhomat e Specializuara të Kosovës në Hagë ka nisur dëshminë dëshmitari i katërt i mbrojtjes, James Peter Covey, në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.
Covey foli për një takim të shtatorit 1999, ku ish-përfaqësuesi ndërkombëtar Bernard Kouchner kishte udhëtuar në Kosovë për të bindur komandantët e zonave të UÇK-së mbi përmbushjen e kushteve të demilitarizimit.
Ai tregoi se gjatë atij takimi Thaçi nuk foli fare dhe se raportet e tij me komandantët e zonave ishin të ndërlikuara.
“Kjo më kujtohet fare qartë, sepse dukej sikur po konfirmonte fuqishëm atë që ne besonim që në fillim, kur jemi njohur me zotin Thaçi. Pra, që ai kishte një marrëdhënie të vështirë e të ndërlikuar me komandantët e UÇK-së në terren dhe se ata kishin shfaqur mungesë respekti ndaj tij. Nuk kishin respekt”, tha dëshmitari, sipas raportimit të “Betimi për Drejtësi“.
Para dëshmisë, Covey u njoh edhe me një pikturë të publikuar në një libër që pretendohet të jetë i gjeneralit Mike Jackson, ku shfaqeshin pjesëmarrësit e atij takimi.
