Sektorët prodhuese të ekonomisë janë në krizë të pandalshme dhe qeveria po e gjen rritjen ekonomike të rritja e rrogave dhe taksat.
Ekonomia shqiptare u rrit me 3.51 për qind në tremujorin e dytë të vitit, krahasuar me të njëjtën periudhë të vitit të kaluar.
Sipas INSTAT, dy të tretat e rritjes ekonomike erdhi vetëm nga dy grupe të lidhura me qeverinë.
Ato ishin grupi “Administrata Publike, Arsimi dhe Shëndetësia”, që kontribuoi me 1.65 pikë përqindje në zgjerimin e ekonomisë si dhe grupi i Taksave Neto, kontributi i të cilit ishte 0.87 pikë përqindje.
Të dy këta sektorë janë të lidhur me qeverinë. Zgjerimi i grupit të parë ka ardhur për shkak të rritjes së pagave për administratën. Ndërsa rritja e grupit të dytë ka të bëjë me lëvizjet fiskale të qeverisë, më saktësisht rritjen e shpenzimeve të buxhetit.
Ndërkohë, sektorët e tjerë të ekonomisë, ata që janë përtej qeverisë, duken në një agoni të thellë. Turizmi, të cilin qeveria e trumbeton si flamurin e ekonomisë shqiptare, në tremujorin e dytë të vitit kontribuoi vetëm me 0.47 pikë për qindje në rritjen e ekonomisë.
Aktivitetet e pasurive të paluajtshme kontribuan me 0.37 pikë përqindje, ndërsa ndërtimi me 0.3 pikë përqindje. Me pak fjalë, Shqipëria ka turizëm dhe udhëtarë, por ekonomia nuk fiton gjë gjë.
Ndërkohë bujqësia dhe industria, vazhdojnë krizën e tyre të pandalshme, teksa të dy sektorët u rrudhën sërish.
Sipas INSTAT, prodhimi bujqësor u ul me 2.5 për qind në tremujorin e dytë, ndërsa industria u rrudh me gati 1.8 për qind. Të dy sektorët dhanë një kontribut negativ në rritjen ekonomike respektivisht me -0.46 pikë përqindje dhe – 0.18 pikë përqindje./BIRN
