Kryetari i grupit parlamentar të Partisë Demokratike, Gazment Bardhi, ka komentuar raportin e fundit të Departamentit Amerikan të Shtetit për klimën e investimeve në Shqipëri, duke e cilësuar atë si një aktakuzë realiste ndaj qeverisjes së Edi Ramës.
Bardhi theksoi se raporti konfirmon denoncimet e opozitës për kriminalizimin e ekonomisë, ku të ardhurat e paligjshme nga droga, kontrabanda, evazioni fiskal dhe korrupsioni pengojnë konkurrencën e ndershme dhe largojnë investitorët e huaj.
Ai shtoi se Ligji për Investimet Strategjike, i miratuar në vitin 2015, nuk ka sjellë rezultatet e pritura, ndërsa shumica e projekteve të miratuara dominohen nga investitorë vendas dhe sektori i turizmit.
Bardhi akuzoi drejtpërdrejt Edi Ramën si përgjegjës për situatën ekonomike, duke shpjeguar se investimet dhe licencat për biznes ndahen në shkelje të konkurrencës, shpesh në takime private apo në bashkëpunim me grupe kriminale si ato të Aruba-s.
Deklarata e plotë:
Raporti i vitit 2025 mbi klimën e investimeve në Shqipëri publikuar nga Departamenti Amerikan i Shtetit është një aktakuzë realiste mbi gjendjen ku ndodhet sot ekonomia shqiptare. Ky raport provoi edhe njëherë denoncimet me fakte të opozitës shqiptare për kriminalizimin e ekonomisë gjatë qeverisjes së Edi Ramës.
Departamenti Amerikan i Shtetit konstaton se prania e madhe e të ardhurave të paligjshme nga trafikimi i drogës, kontrabanda, evazioni fiskal dhe korrupsioni shtrembërojnë konkurrencën në treg. Raportimi i investitorëve se mund të jenë objekt shantazhesh nga administrata publike, media dhe grupe kriminale, është faktori kyç që mban larg investimet e huaja nga Shqipëria.
Ligji për Investimet Strategjike, i miratuar në vitin 2015 me qëllim nxitjen e investimeve vendase dhe të huaja në sektorët strategjikë, nuk ka tërhequr shumë investime të huaja, pavarësisht zgjatjeve të shumta përtej afatit fillestar, dhe se shumica e mbi 60 projekteve të miratuara fokusohen në sektorin e turizmit dhe dominohen nga investitorë vendas.
Gjendja e trishtë e përshkruar në raportin e Departamentit Amerikan të Shtetit nuk ka ardhur nga hiçi. Ajo është krijuar nga Edi Rama, që investimet, lejet e licencat për biznes, në shkelje të konkurencës, i ndanë në takime private nëpër hotelet e botës apo nëpër takime sekrete me krimin e organizuar si ai në Aruba. Për të ndryshuar gjendjen, për të çliruar ekonominë nga korrupsioni e krimi i organizuar, duhet të largohet përgjegjësi i kësaj situate që është Edi Rama.
Nga krimi, te korrupsioni dhe paratë e drogës/ Klima e investimeve, raporti i DASH “nxin” Qeverinë
