Kryetari i Lëvizja Bashkë, Arlind Qori, i ftuar në emisionin “Të Paekspozuarit” ka folur për mbylljen e paprecedent të seancës parlamentare ku do të prezantohej programi i qeverisë.
Qori e quajti këtë një ngjarje “skandaloze” dhe mjaft të rëndë, duke e krahasuar kryeministrin me Musolinin, ndërkohë që tha se institucionet në Shqipëri kanë vdekur.
“Nuk ma priste mendja që do të ndodhte kjo gjë, që seancën ku diskutohet përbërja e qeverisë dhe votohet qeveria, diskutohet programi, seanca që zgjasin me ditë të tëra, gjithçka të mbyllej për pak minuta në shkelje të rregullores dhe Kushtetutës. Sado të justifikohet Rama që dy-tre vetë prishin seancën, ata mund të përjashtohen, por të gjesh pretekstin për të mbyllur në mënyrë anti-kushtetuese Kuvendin, është shumë e rëndë. Akoma më e rëndë, nëse ky veprim projektohet në katër vitet e ardhshme, pra do të jetë vazhdimësia e Kuvendit. Kjo do të thotë që insitutcionet kanë vdekur në Shqipëri.
Përfaqësuesi ynë, Redi Muçi, ka kohë që përgatit fjalimin dhe nuk iu dha mundësi të përligjë kritikat e tij dhe votën kundër.
Në vitin 1922 Musolini vjen në pushtet nën kërcënimin e rrugaçërisë. Ai thotë po të doja unë, këtu nuk kishte fare Parlament, se do të vinin djemtë e mi dhe ju rrihnin, por jam tolerant dhe ju lejoj të rrini këtu, por Musolini i çoi pas pak kohësh ata djemtë aty dhe vendosi diktaturën e partisë fashiste.
Rama akoma nuk ka future patronazhistët të rrahin njerëzit në Parlament, por nuk do të ishte çudi ta bënte. Mirëpo, i rrezikshëm është fakti, që Rama thotë po nuk u sollët si dua unë, unë mbyll Kuvendin. Këtë vendim e merr Rama. Ajo seancë nuk duhej mbyllur edhe nga pikëpamja e rregullores. Niko Peleshi ka vepruar si njeri pa minimumin e autonomisë, sillet si sekretar i Ramës. Nga pikëpamja kushtetuese është i dyti në hierarkinë e shteti. Të dalë Rama dhe Balla dhe ta vendosin publikisht, t’ju thonë deputeëve, po nuk u sollët si dua unë, mbyll seancën dhe votojmë, kjo është skandaloze dhe tregon faktin që në Shqipëri institucionet janë të vdekura. Kuvendi është institucion kushtetues dhe mund të funksionojë nëse u jepet mundësia deputetëve të thonë fjalën e tyre.
Të dyja palët kanë interes që aty të mos ketë Parlament, kritikë, alternativë, këtu ka interes për këtë që po ndodh, Rama të kalojë gjithçka pa diskutim dhe Berisha të tregojë se është i fortë dhe e sheh forcën nëpërmjet rrëmujës.
Rrëmuja i intereson Ramës në çdo moment. Opozita thotë na provokoi dhe është e vërtetë, por si reagon ndaj provokimit, bie pre, apo përmes fjalës artikulon një alternativë, e nxjerr Ramës të shëmtuar siç është? Po shkoi puna për wrestling, i fituar është ai që është në pushtet”, – deklaroi Qori.
