Erion Braçe, përmes një videoje të publikuar në rrjetet sociale, ka shpërthyer në akuza ndaj kryetares së komanduar të Bashkisë Tiranë, Anuela Ristani.
Reagimi i Braçes vjen pasi ngriti shqetësimin për një masakër mjedisore në kryeqytet, ku denonconte se në zonën e Selitës koshat e mbeturinave ndodhen pranë kopshtit, postës dhe qendrës shëndetësore.
Braçe ka nxjerrë mesazhin që i ka dërguar Anuela Ristani, pas postimeve të tij në rrjet, ku kryetarja në detyrë i ka dërguar numrin e nënkryetarit Ilir Mëngra dhe krahas numrit i shkruan “Që të ardesosh saktë videon e radhës”.
Pra, siç duket, Anuela Ristanit nuk i ka pëlqyer fakti që Erion Braçe shqetësimet i bën publike dhe pamjet i poston në rrjetet sociale dhe i kërkon që herë tjetër t’ia dërgojë vetëm nënkryetarit.
Sipas deputetit socialist, Anuela Ristani jo vetëm që nuk ka bërë asnjë punë që prej muajit Shkurt kur ka marrë detyrën, por ka edhe kurajon që të bëjë ironi, dhe sipas tij, kjo tregon arrogancën e pushtetit dhe se duhet të ketë turp.
“PËR ARROGANCËN E ATYRE QE JU KEMI DHËNË PUSHTET, QOFTË EDHE TE VOGËL NË NIVEL VENDOR: TUUURP TE KESH!
Arroganca jote perballë hallit të njerëzve e shqetësimit të një deputeti, meriton vetëm: TE KESH TURP!
Prej SHKURTIT jo vetem që nuk bën gjë prej gjëje por ka edhe kurajon të bëj ironi e të të percjell mesazhin banal: NUK PYES PËR GJË! (Në fakt është tjetër gjuha e saj që përcjell mesazhi, por për etikë po e mendoj te tille).” – shkruan Braçe krahas videos së publikuar në rrjet.
Ndërkohë në video Braçe thotë se problematikën ja ka përcjellë që prej muajit shkurt, çdo javë, në telefon dhe në zyrë, por askush s’ka vepruar dhe sipas deputetit, ja bën atij që tenton të mbledhë vota, që Anuela Ristani të jetë sërish në pushtet.
“Kjo është Anuela Ristani, nënkryetarja e Bashkisë ose kryetarja e Bashkisë në detyrë. Më shkruan mua e me thotë: ‘Që të adresosh saktë videon e radhës’. Dhe më dërgon kontaktin e një nënkryetari tjetër bashkie. A thua se ne punojmë për Anuelën…unë punoj për Anuelën dhe ata atje në Selitë ja kanë për borxh Anuelës bezdisjen për problemet e tyre.
Më ka shkruar dje në orën 19:07, ndërkohë që i kam folur Anuelës publikisht diku rreth orës 09:00 të mëngjesit. Dhe jo për hallin tim personal, as për shtëpinë time, as për rrugën time. I kam folur për një situatë emergjence mjedisore që zgjat prej muajsh mu në mes të Selitës, 5 hapa larg nga qendra shëndetësore, 3 hapa larg nga posta dhe 6 hapa larg nga kopshti i papranueshëm i fëmijëve për koshat e plehrave që ka vendosur në mes të tyre, ku dje ishte shtuar edhe një qenush i ngordhur, i vrarë apo i helmuar.
Në derë të qendrës shëndetësore, postës dhe kopshtit të fëmijëve mes lagjes! Ajo që bën përshtypje është arroganca e këtij njeriu, bën ironi me një gjë që ia kam paraqitur si shqetësim që në muajin shkurt në zyrën e saj.
Ia kam përsëritur thuajse javë për javë në telefon, në mesazhe, përsëri në zyrën e saj. Dhe kujt ia bën? Atyre njerëzve aty në Selitë, mua gjithashtu që duhet të bëj fushatë për të mbledhur vota që Anuela të jetë prapë në pushtet. Anuela! Kuptoni? Me këtë kam të bëj e me këtë keni të bëni! Me Anuelën.” – shprehet Braçe.
