Ish-këshilltari i Donald Trump, Steve Bannon, ka hedhur dyshime mbi versionin zyrtar të hetimeve për vrasjen e aktivistit konservator Charlie Kirk, duke kërkuar një hetim më të gjerë mbi një komplot të mundshëm.
Prokurorët në Utah publikuan të martën mesazhet telefonike mes 22-vjeçarit Tyler Robinson dhe partnerit të tij transgjinor Lance Tëiggs, ku Robinson pranon se e vrau Kirk javën e kaluar në Universitetin e Luginës së Utah. Në mesazhe, ai shpjegon se motivi i tij ishte se ‘nuk duronte më urrejtjen’ e Kirk.
Megjithatë, Bannon, në podcastin e tij ‘War Room’, tha se nuk beson në versionin e FBI-së se Robinson veproi i vetëm.
‘Nuk po e besoj këtë skenar, mesazhet duken si një skenar i dobët filmi. Duhet të shkojmë deri në fund të kësaj çështjeje,’ tha ai.
‘Duhet të zbulojmë lidhjet me grupet radikale, të shohim nëse ka ndonjë lidhje me Butler, ku Thomas Crooks u përpoq të vriste Trump-in më 13 korrik 2024 në Pensilvani.’
Robinson, i cili tashmë është akuzuar zyrtarisht për vrasje, përballet me dënimin me vdekje nëse shpallet fajtor.
Bannon u shpreh i habitur për faktin se Robinson në mesazhet e tij shprehte më shumë shqetësim për pushkën e gjyshit se për vrasjen e Kirk.
‘Ju sapo vratë njeriun më të rëndësishëm të lëvizjes konservatore dhe shkruani që ‘babai do të mërzitet se humba pushkën e gjyshit’? Po talleni!?’, tha Bannon me ton të ashpër.
‘Babai yt ndoshta është më i shqetësuar që ti vrave një njeri në gjakftohtë, jo për pushkën!’
Figurat mediatike në të dyja anët e spektrit politik kanë kërkuar nga administrata Trump një hetim të plotë dhe transparent mbi rrethanat e atentatit. Presidenti dhe zyrtarë të tjerë të lartë e kanë fajësuar ‘të majtën radikale’ për nxitjen e aktit.
Guvernatori i Utah, Spencer Cox, deklaroi se Robinson ishte i motivuar nga ‘ideologjia e tij e majtë’.
Ndërkohë, drejtori i FBI-së, Kash Patel, tha se agjencia po heton një grup bisedash në Discord, ku Robinson dyshohet se ka pranuar krimin dhe se të gjithë anëtarët e grupit do të verifikohen.
Bannon ka zbuluar gjithashtu se administrata po shqyrton disa veprime ekzekutive, përfshirë shpalljen e Antifa-s si organizatë terroriste brenda SHBA.
‘Duhet ta zgjerojmë hetimin nga një vrasje e thjeshtë në një komplot më të gjerë,’ tha Bannon.
‘Nëse do të shkojmë në luftë, le të shkojmë në luftë.’
