Këshilltarët bashkiakë të Partisë Socialiste në Tiranë do të mblidhen sot pasdite në një mbledhje të jashtëzakonshme, e cila pritet të nisë në orën 17:00, në selinë e PS.
Në qendër të diskutimeve do të jetë kërkesa e kryeministrit Edi Rama për shkarkimin e kryetarit aktual të Bashkisë së Tiranës, Erion Veliaj.
Pak ditë më parë, Rama u ka kërkuar zyrtarisht anëtarëve socialistë që të votojnë largimin e Veliajt nga detyra, një zhvillim që ka hapur debate të forta brenda strukturave të PS në kryeqytet.
Veliaj akuzohet për një sërë veprash penale, si korrupsioni, fshehja e pasurisë, apo edhe favorizim i biznesmenëve në tenderat dhe lejet e ndërtimit të dhëna nga Bashkia e Tiranës.
Aktualisht Erion Veliaj ndodhet në paraburgimin e burgut të Durrësit. Ai u arrestua mesditën e 10 Shkurtit në Bashkinë e Tiranës me urdhër të SPAK, teksa i është lënë në fuqi masa e “arrestit me burg” nga të tre shkallët e gjyqësorit.
