Kreu i Lëvizjes Bashkë, Arlind Qori, ka reaguar lidhur me listën e stafit të Elisa Spiropalit, ku paguante 17 persona si këshilltarë dhe ekspertë, me paga mbi 33 milion lekë të vjetra në muaj, teksa pjesa më e madhe e tyre nuk kryenin funksionin real.
Në një video në rrjetet sociale, Qori i kujton Spiropalit projekt-ligjin për minimumin jetik, të cilin e kishin firmosur 21 mijë qytetarë dhe Kuvendi nën drejtimin e saj nuk e mori fare në shqyrtim, por e ktheu sërish mbrapsht.
Ai ngre pyetjet se deri kur do ta durojnë shqiptarët këtë situatë, ku këto shushunja dhe parazitë, siç i konsideron ai, do t’u nëpërkëmbin dinjitetin.
“Mbi 33 milion lekë i ka kushtuar buxhetit të shtetit çdo muaj në 4 vitet e fundit pagat e 17 ekspertëve dhe këshilltarëve të ish-kryetares së Kuvendit, Elisa Spiropali. Mes tyre çfarë nuk gjen, eurodeputet në pension, ish-deputet të PS-së, kalamaj politikanësh, por edhe nga këta analistët që dërdëllisin duke mbrojtur qeverinë çdo mbrëmje në studiot televizive.
Përpara dy vitesh e gjysmë, Lëvizja Bashkë, me firmat e 21 mijë qytetarëve, ka depozituar në Kuvend projekt-ligjin e minimumit jetik, por Kuvendi i Shqipërisë, me në krye Elisa Spiropali nuk i ka kushtuar as 30 sekonda këtij projekt-ligji, duke na i kthyer mbrapsht si të pashqyrtuar nga Kuvendi i vjetër i Shqipërisë.
Ne jemi tallur me znj.Spiropali kur e krahasonte shefin e vet Edi Ramën me Skënderbeun, por më duket se për veç se të qeshim me të, duhet të qajmë edhe me fatin tonë si qytetarë të një vendi ky pensioni minimal është rreth 90 mijë lekë të vjetra dhe pensioni mesatar rreth 180 mijë lekë të vjetra.
Pra, këta këshilltarë dhe ekspertë të Elisa Spiropalit merrnin rrogë sa 355 pensionistë me pension minimal. Tani pyetja që unë kam për shoqërinë shqiptare është kjo. Duke parë dhe se çfarë ndodh nëpër botë, nga Nepali në Evropë, ku popujt ngrihen në këmbë për të vënë në vend dinjitetin e tyre, për të luftuar të korruptuarit dhe për të kërkuar drejtësi shoqërore, ne si shoqëri shqiptare, deri kur do t’i durojmë këto shushunja e parazitë që na pinë gjakun ngado në hierarkinë shtetërore? Deri kur do të lejojmë që të na nëpërkëmbin këta njerëz dinjitetin tonë? Cila do të jetë dita e kthesës së madhe kur edhe ne si shqiptarë do të vendosim në vend dinjitetin tonë?” – shprehet Qori.
