I ftuar në emisionin “Opinion”, juristi Jordan Daci komentoi emërimin e ministres virtuale “Diella” në kabinetin e katërt qeveritar të Edi Ramës.
I pyetur nga në aspektin ligjor, Daci tha se: “Nuk mund të ketë staf, patjetër staf teknik, por jo. Në asnjë vend të botës, shpresoj të mos vijë koha që stafet të varen nga sistemet elektronike, se pastaj i bie të jemi te Matrix-i.”
Ai theksoi se kjo qasje është joligjore “nga fillimi deri në fund” dhe se, në kuptimin formal juridik, emërimi i një entiteti virtual nuk duhej të ishte dekretuar.
“Presidenti këtë gjë të paktën e kishte bërë; është në varësi të kryeministrit. Një krijesë që nuk është në asnjë vend të botës. Është shumë herët për këtë. Zero nuk ka status juridik,” tha Daci, duke iu referuar ministres digjitale që Rama prezantoi në kabinetin e tij.
Sipas juristit, edhe Bashkimi Europian ka një kornizë ligjore për inteligjencën artificiale, e cila parashikon që në rastet kur një algoritëm përfshihet në një proces vendimmarrës, ai të jetë i auditueshëm dhe i aksesueshëm për palët në një proces ligjor.
“Do duhet të shkojë në gjyq, algoritmi i saj do duhet t’u vihet palëve në dispozicion në një proces ligjor dhe pastaj nuk hyn më. Në kuptimin formal juridik është shkelje dhe nuk mund të ishte dekretuar. Në kuptimin politik, Rama është mjeshtër për këtë,” u shpreh Daci.
Juristi vuri në dukje gjithashtu se Shqipëria nuk ka as kapacitete për të prodhuar diçka të tillë në mënyrë të pavarur dhe funksionale.
“Gjithsesi, qëllimi dhe ideja nuk është as për t’u kritikuar dhe as për të bërë humor, sepse bota atje po shkon. Por dhënia e një vlere juridike nuk është serioze. Nuk e pengonte qeverinë të ngrinte një projekt pilot, por tentativa për ta bërë një gjë të tillë tregon një injorancë kushtetuese,” përfundoi ai.
