Tërmeti shkakton tërmetin e radhës. Në një reagim publik për një rast emergjent në malin e Zagorisë, Tërmet Peçi ish-kryebashkiaku i Tepelenës dhe njeri i njohur për energjinë (dhe entuziazmin e tepërt) ka vendosur të bëjë një akt të rrallë institucional: të falënderojë një ministre që nuk është ajo që mendon. Ai ka falënderuar Ministren Albana Koçiu duke e etiketuar si ministre të Shëndetësisë.
Në vend që të falënderojë Ministrinë e Shëndetësisë për helikopterin e urgjencës, Peçi i drejtohet me mirënjohje znj. Albana Koçiu, e cila është, për hir të kujtesës, Ministre e Brendshme.
Ky veprim ka ngritur shumë pikëpyetje, por edhe shumë buzëqeshje:
A mos vallë qeveria Rama ka bërë një “riorganizim të fshehtë” dhe nuk na ka thënë?
Apo ndoshta Peçi po zbulon qeverinë e vet personale, që nuk përputhet me organigramën zyrtare të shefit të tij?
Mos vallë ka nisur rebelimi brenda radhëve të socialistëve?
Nëse për Tërmetin, Ministria e Brendshme shpëton jetë me helikopterë mjekësorë, atëherë mund të presim që për raste kriminale, të thërrasim Ministrinë e Bujqësisë, dhe për ndonjë aksident rrugor, Ministrinë e Kulturës.
E thënë ndryshe:
Tërmeti nuk ja miraton qeverinë Ramës, e ka bërë vetë një të re.
Atje ku postet ndahen jo sipas dekretit, por sipas falënderimeve emocionale dhe kujtesës selektive.
Përveç pjesës sarkastike që tregon nivelin e ligjvënësve, ky lajm ka pjesën e tij shqetësuese ku deputeti i bën jehonë një veprimi si shpëtimi i jetës së njerëzve, që është detyrim ligjor i njerëzve që paguhen për këtë punë. Pra imagjinoni një qytetar që nuk njeh Tërmetin dhe merr në telefon, i bie që do vdesë sepse nuk ka kush ta shpëtojë. E trishtueshme, por jemi në mëshirën e Tërmetit.
