Dhjetëra mijëra qytetarë protestuan të dielën e 14 shtatorit në Ankara kundër një procesi gjyqësor që mund të largojë të hënën nga detyra liderin e partisë kryesore opozitare.
Pamjet nga Ankaraja treguan turma të mëdha që brohorisnin për dorëheqjen e presidentit Recep Tayyip Erdogan, duke valëvitur flamuj turq dhe pankarta të partisë opozitare.
Gjykata pritet të vendosë të hënën nëse do ta shpallë të pavlefshëm kongresin e vitit 2023 të Partisë Popullore Republikane (CHP), për shkak të dyshimeve për parregullsi procedurale. Ky vendim mund të riformatojë partinë, të shkaktojë tronditje në tregjet financiare dhe të ndikojë në afatin e zgjedhjeve të përgjithshme të planifikuara për vitin 2028. Gjykata gjithashtu mund të shtyjë shpalljen e vendimit.
Gjatë tubimit të së dielës, kreu i CHP-së, Ozgur Ozel, deklaroi se qeveria po përpiqet të qëndrojë në pushtet duke minuar normat demokratike dhe duke shtypur kundërshtimin politik, pas fitoreve të opozitës në zgjedhjet lokale gjatë vitit të kaluar. Ai gjithashtu bëri thirrje për zgjedhje të parakohshme.
Opozita turke betohet se do të rezistojë
“Kjo çështje është politike. Akuzat janë shpifje. Shokët tanë janë të pafajshëm. Ajo që po ndodh është një grusht shteti, një grusht shteti kundër presidentit të ardhshëm, kundër qeverisë së ardhshme. Ne do të rezistojmë, do të rezistojmë, do të rezistojmë,” tha Ozel në fjalën e tij para protestuesve.
Qeveria këmbëngul se gjyqësori është i pavarur dhe mohon çdo motiv politik pas proceseve. Sipas një analize të Reuters, gjatë një viti, më shumë se 500 persona janë arrestuar në Turqi, përfshirë 17 kryetarë bashkish në Stamboll dhe qytete të tjera ku qeveris CHP, si pjesë e hetimeve për korrupsion.
Qindra anëtarë të CHP-së janë burgosur në pritje të gjyqit si pjesë e një hetimi të gjerë për korrupsion dhe lidhje me terrorizmin, mes tyre edhe rivali kryesor politik i Erdoganit, kryebashkiaku i Stambollit, Ekrem Imamoglu.
Arrestimi i Imamoglu-së në muajin mars shkaktoi protestat më të mëdha në vend gjatë dekadës së fundit, me qindra mijëra njerëz që dolën në rrugë, duke shkaktuar një rënie të mprehtë të lirës turke dhe pasurive të tjera financiare në vend.
Në një letër dërguar nga burgu dhe lexuar gjatë tubimit në Ankara, Imamoglu shkruante se qeveria po përpiqet të ndikojë rezultatin e zgjedhjeve të ardhshme duke eliminuar rivalët e ligjshëm. Ai gjithashtu akuzoi qeverinë se po minon demokracinë përmes veprimeve gjyqësore me motive politike dhe përpjekjeve për të shtypur opozitën.
“Epoka e ‘unë’-it në këtë vend do të përfundojë, dhe do të fillojë epoka e ‘ne’-ve. Një person do të humbasë, dhe të gjithë të tjerët do të fitojnë,” shkruante Imamoglu.
Pas leximit të letrës, turma shpërtheu në duartrokitje dhe brohoriti “Presidenti Imamoglu”.
