Aksioni i IKMT-së për prishjen e ndërtimeve pa leje në Parkun Kombëtar të Valbonës ka tronditur banorët e zonës, duke sjellë dëshpërim, lot dhe akuza të forta.
Të moshuar që kishin ngritur bujtinat me kursime nga djemtë emigrantë, panë fadromat të shembnin muret para syve të tyre. “Jemi shqiptarë, votues të Edi Ramës. Sot më mirë të na pushkatonin. Na vunë fadromën mbi krye dhe na lanë pa bukë,” tha mes lotëve një i moshuar për mediat.
Sipas të dhënave zyrtare, deri tani janë shembur 3 objekte, 16 të tjera po çmontohen nga vetë banorët për të shpëtuar materialet dhe 3 mbeten në listën e IKMT.
Atmosfera në fshat është e rënduar: shumë familje, që jetonin vetëm nga turizmi, ndihen të braktisur dhe të tradhtuar. “Kemi marrë kredi, kemi shitur bagëti dhe sot gjithçka na e rrafshuan. Kjo nuk është drejtësi, ky është krim,” – u shpreh një tjetër banor.
“Jam me plot ilaçe, e kam shtëpinë me ujë dhe lagështirë. E kemi ndërtuar për të ngrënë një copë bukë. Fëmijët janë duke qarë… Këtë vit e bëmë, këtë vit e prishën. Të na mbysin ne nëse duan me e prish… ”, tha e moshuara mes lotësh.
“Ia prish çatinë… jam shqiptar, nuk jam serb. Rrëzoje dhe lere ashtu… nuk ka bërë vaki. Në tokë tonë, në shtëpinë tonë, është gjynah. Me djeg shqiptari shqiptarin, më keq nuk ka. Kanë ardhur 3 policë dhe 1 police e më thanë ‘Ja pafshi hajrin’. Para votimeve i kemi ndërtuar”, u shpreh i moshuari tjetër.
Aksionet për prishjen e ndërtimeve pa leje në zonat malore nuk janë të reja. Vetëm dy muaj më parë, fshati turistik i Thethit u trondit nga ndërhyrja e IKMT-së, ku u shembën dhjetëra kabina e bujtina prej druri. Aty, banorët akuzuan kryeministrin Rama për premtime të pambajtura dhe për mesazhe kontradiktore: fillimisht i ftoi të investonin në trojet e të parëve, më pas i etiketoi si “kriminelë” dhe “zaptues”.
Shumë prej tyre, të rikthyer nga emigracioni me kursime e kredi, panë ëndrrat e tyre të shkatërruara para syve.
Nga ana tjetër, Kryeministri Edi Rama, është shprehur se aty nuk janë prekur banorët e zonës, por “individë që nuk kishin as lidhje me vendin”. “Nuk bëhet fjalë për disa të shkretë, por për ndërtime për qëllime fitimi,” tha Rama, duke shtuar se qeveria ka legalizuar mbi 300 shtëpi të vjetra në Theth dhe se operacioni kishte për qëllim “të çlironte zemrën e parkut kombëtar”. Ai përsëriti se nuk do të ketë asnjë tolerancë për ndërtimet pa leje dhe paralajmëroi vijimin e aksioneve në të gjithë vendin.
“Nuk bëhet fjalë për disa të shkretë, bëhet fjalë për individë të cilët janë ngjitur deri atje dhe në një masë të konsiderueshme të rasteve nuk janë banorë të atij vendi dhe rasti flagrant që u bë shkak janë individë që as janë shfaqur të pretendojnë asgjë. Policia po heton si ka ndodhur dhe kush është mbrapa pushtimit të zemrës së Thethit dhe bëhet fjalë për ndërtime të cilat nuk janë për të futur kokën, po janë për qëllime fitimi. Nuk e di të ketë ndonjë teori që e amniston shkelësin e ligjit duke ja ngarkuar fajin strukturave të shtetit nëse nuk e kapin shkelësin në sekondën kur ai fillon bën shkeljen. Mbetet për të parë se çfarë përgjegjësie do të marrë KLP lidhur me zonjën Gjeli e cila nuk ka pranuar të fillojë as hetimet bazuar në denoncimet e bëra. Në Theth janë goditur 40 objekte dhe Policia ka një numër të konsiderueshëm denoncimesh të bëra në prokurori lidhur me këto objekte dhe prokuroria nuk ka ndërmarrë asnjë hetim”, tha Rama.
Por fjalët e kryeministrit bien ndesh me realitetin e Valbonës, ku janë shembur kryesisht shtëpi e bujtina familjare, të ngritura nga banorë të zonës për të siguruar mbijetesën. “Na quan të shkretë, na quan pushtues. Po ku të jetojmë? Këtu kemi lindur, këtu kemi varret e prindërve. Nuk kemi tokë tjetër,” – reagoi një banore.
