Kryeministri Edi Rama, gjatë mbledhjes së Asamblesë së Partisë Socialiste, bëri me dije se do të nisin procedurat për shkarkimin e kryebashkiakut Erion Veliaj.
Në vend të tij, kryeministri njoftoi se Ogerta Manastirliu do të kandidojë për pozicionin e kryebashkiakes.
“Sot kemi një kryetar bashkie i zgjedhur tre herë, i dënuar jo për detyrën si kryetar. I janë nxjerrë edhe biseda me familjarët nga telefoni i burgut. Kjo nuk ndodh në asnjë vend demokratik. Diktatorial, jo e jo. Është shkelja më e hapur dhe më flagrante në shpërdorim të detyrës, nga ana e tyre që duhet të mbajë nën kontroll hetimet. Tirana ka punë të mëdha dhe të panumërta, përditë e përnatë. Nuk i heq asnjë meritë kryetares në detyrë për sa ka bërë në këto 7 muaj. E falënderoj për përkushtimin. Por sot ne duhet të marrim një vendim politik, për t’i hapur rrugë zgjedhjeve për kryetarin e bashkisë në Tiranë”, tha Rama.
Shkarkimi i Veliajt vjen pas përfundimit të hetimeve paraprake nga Prokuroria e Posaçme Kundër Korrupsionit dhe Krimit të Organizuar (SPAK), e cila dje ka dërguar për gjykim dosjen penale në ngarkim të kryebashkiakut, bashkëshortes së tij Ajola Xoxa, 7 biznesmenëve dhe 8 personave të tjerë, si dhe 12 kompanive dhe OJF-ve. Gjyqtare e seancës paraprake është caktuar Etleva Deda.
Veliaj akuzohet për 13 vepra penale, ndërsa bashkëshortja e tij për 12 vepra penale. Mes të pandehurve të tjerë janë edhe ish-kryetarja e Komisionit të Ligjeve, Klotilda Bushka, dhe biznesmenët Elman Abule, Gentian Sula, Fatmir Bektashi, Meriman Palushi, Shkëlqim Fusha, Sokol Kryeziu dhe Mirton Lika.
Hetimet e SPAK-ut kanë dokumentuar një sërë veprash penale, duke përfshirë korrupsionin, fshehjen e pasurisë dhe favorizimin e biznesmenëve në tendera dhe leje ndërtimi të dhëna nga Bashkia e Tiranës.
Aktualisht, Veliaj ndodhet në paraburgim në burgun e Durrësit. Ai u arrestua më 10 shkurt me urdhër të SPAK, dhe masa e “arrestit me burg” është lënë në fuqi nga të tre shkallët e gjyqësorit.
