Kryeministri Edi Rama ka bërë për “ujë të ftohtë” kryebashkiakët në takimin për “paketën e Maleve”, duke u tërhequr veshin pothuajse të gjithë të zgjedhurve vendorë, duke i akuzuar se po bëhen pengesë për procesin duke mos dorëzuar hartat e zonave dhe tokave ku mund të realizohet projekti i kaluar edhe me ligj.
Duke harruar se këto procese burokratike janë produkt i politikave të vetë qeverisë që Rama drejton, ai fillimisht ai u kap me kryebashkiakun e Kuçovës, Kreshnik Hajdarin të cilit i vuri në dukje se sikurse të tjerët, nuk i kishte dorëzuar hartat.
“Ti Kreshnik, p.sh., çfarë të ka penguar që të bësh hartën e zonave prioritare dhe ta dërgosh në qeveri? Pse nuk e ke dorëzuar?”, tha Rama.
Hajdari u përgjigj se zonat janë shpallur, por se po pritet përgjigjja nga Agjencia Shtetërore e Kadastrës (ASHK).
Kryeministri reagoi ashpër: “Nëse ti pret përgjigjen nga ASHK, ti nuk ke kuptuar ligjin dhe nuk ke kuptuar paketën.”
Por ai nuk u ndal këtu, teksa shihte kryebashkiakët që komunikonin me njëri-tjetrin për ato që kërkonte kryeministri, Rama ndërhyri dhe “goditi” kryebashkiaken e Dimalit (Ura Vajgurore), Juliana Mema.
“Edhe ti s’e ke sjellë, mos i tund kokën atij aty, mos fol me Xhakollin (i drejtohet kryebashkiakes së Dimalit, Juliana Mema). Unë e di që ti ke trasenë e Leninit që të flasësh me 7 veta (i drejtohet përsëri Memës), por po them se kjo paketë u bë për të lehtësuar totalisht ata që duan të investojnë te toka e të parëve të tyre dhe s’i kanë dokumentet. Vijnë në bashki, shprehin interesin, e presin.
Ndaj krijohet mundësia, jepet një kontratë me një çmim një euro, e mundëson kontrata këtë, ai e bën investimin derisa të fitojë edhe të drejtën e tokës në fund të mbarojë procesi”, nënvizoi ai.
