Gjashtë Bashki të vendit pritet t’i drejtohen zgjedhjve të parakohshme lokale, për shkak se kanë mbetur pa kryetarë.
Më konkretisht, prej muajit maj, tre bashki të vendit, Tepelena, Berati dhe Mati, kanë mbetur pa kryetar, pasi të zgjedhurit e tyre Tërmet Peçi, Ervin Demo dhe Agron Malaj lanë postin për të hyrë në Parlament. Deri më sot, drejtimi është marrë përsipër nga nënkryetarët e komanduar.
Po ashtu, edhe Bashkia e Tiranës ka mbetur pa kryetar që prej muajit shkurt, kur Erion Veliaj u arrestua në zyrën e tij me urdhër të SPAK dhe ndodhet ende në paraburgim.
Pasi SPAK dërgoi ditën e djeshme dosjen për gjykim, Edi Rama sot në Asamblenë e PS-së njoftoi mbajtjen e zgjedhjeve të reja në Tiranë, pasi kryeqytetit sipas tij, nuk duhet të rrijë pa “kokë” dhe i kërkoi Këshillit Bashkiak që mos e zgjatë më shumë se 7 ditë procesin e shkakrimit të Veliajt. Po ashtu, ai shpalli edhe kandidaturën e PS-së, e cila do të jetë Ogerta Manastirliu.
Një tjetër bashki që do të shkojë në zgjedhje të parakohshme është Vlora. Kjo për shkak se kryebashkiaku Ermal Dredha dha ditën e djeshme dorëheqjen, pas përplasjeve dhe krititave të vazhdueshme që merrte nga Edi Rama.
Zgjedhje do të zhvillohen gjithashtu edhe në Bashkinë e Cërrikut, pasi kryebashkiaku aktual Andis Salla do të jetë ministër i Bujqësisë dhe Zhvillimit Rural, i shpallur sot nga Rama dhe pritet që ai të japë dorëheqjen.
Kodi Zgjedhor i jep të drejtën Presidentit të Republikës të caktojë datën e zgjedhjeve, por vetëm pasi të njoftohet nga qeveria për vakancat.
Qeveria priotet të njoftojë zyrtarisht presidentin brenda shtatorit për vakancat dhe më pas kreu i shtetit duhet të caktojë datën brenda 48 orëve. Zgjedhjet do të mbahen jo më herët se 30 ditë dhe jo më vonë se 45 ditë nga ky moment.
Burime brenda radhëve të socialistëve bëjnë me dije se zgjedhjet pritet të mbahen në muajin Tetor, për të cilat ata kanë nisur përgatitjen prej kohësh.
