25-vjeçarja Meri Kacerri, ishte një prej qytetarëve të pafajshme, e cila u kap nga plumbat e krimit në masakrën e regjistruar mëngjesin e të hënës në Shkodër, me dy viktima dhe dy të plagosur.
Ajo punonte si kamariere në lokalin ku ndodhi ngjarja në momentin kur u kap nga breshëria e plumbave. Fatmirësisht, ajo u mbijetoi plagëve të marra, teksa mësohet se ndodhet në spitalin e Traumës në gjendje stabël.
Gjithsesi, mësohet se 25-vjeçarja ka nevojë për një ndërhyrje në krahë, aty ku ka marrë plagë, për shkak se ka fraktura. Lidhur me këtë situatë, familjarët e Meri Kacerrit kanë kërkuar ndihmë.
Ata kanë hapur një “gofundme” dhe përmes një njoftimi kanë kërkuar ndihmë me qëllim kurimin e mëtejshëm të të resë.
“Situata është shumë delikate dhe kërkon ndërhyrje të menjëhershme mjekësore, operacione dhe trajtime që shoqërohen me shpenzime të konsiderueshme, ndaj, me vështirësi të madhe, por me dorën në zemër, ju drejtohemi juve, miqve, të njohurve dhe çdo zemre të mirë që mund të japë një dorë.
Çdo kontribut, sado i vogël, është një hap drejt shpresës, shërimit dhe rikthimit të Merit në jetën e saj të zakonshme.
Mirënjohja jonë është e pafund për çdo mbështetje, qoftë ajo financiare, shpirtërore apo edhe thjesht duke ndarë këtë fushatë me të tjerët.
Le ta ndihmojmë të gjithë bashkë Merin që të ngrihet përsëri në këmbë”, shkruhet në këtë njoftim.
*Kliko këtu për linkun e “gofundme”
