“Inspektorët e Autoritetit Kombëtar të Ushqimit nuk kanë pasur asnjë rol në eksportin e domateve.”
Kështu shprehet Arenc Berati, avokati i Ronaldo Likës, njërit prej inspektorëve të AKU-së që u ndaluan në lidhje me ngarkesën prej 8 tonësh domate të eksportuara nga Shqipëria që u bllokua në Kroaci, pasi rezultuan me pesticide
Ngarkesa i përkiste kompanisë së eksporteve, “EraFruit”, me administrator 40-vjeçarin Mariglen Qorri, i cili po ashtu u ndalua nga policia, së bashku me inspektoren tjetër të AKU-së, Griselda Dokasani.
Sipas avokatit të Ronaldo Likës, në radhë të parë nuk kemi të bëjmë me një arrestim të inspektorëve të AKU-së me urdhër të Prokurorisë së Beratit, por janë ndaluar me urdhër ndalimi të lëshuar nga Oficeri i Policisë Gjyqësore (OPGj), në kuadër të një hetimi paraprak.
Më tej, avokati Arenc Berati shton se inspektorët nuk kanë pasur asnjë lidhje me procesin e eksportimit të domateve. Avokati shkruan se kontrolli i ushtruar prej tyre është kryer vetëm pas njoftimit zyrtar të ardhur nga autoritetet kroate, sipas të cilit produkti ishte shpallur i papërshtatshëm dhe ishte asgjësuar në Kroaci.
Ndërkohë, në lidhje me kontrollet e ushtruara në subjektin “EraFruit”, sipas avokatit ka rezultuar se:
• I gjithë produkti prej 8 tonësh ishte eksportuar;
• Në magazinë nuk kishte mbetur asnjë mostër e disponueshme;
• Ngarkesa nuk është rikthyer në Shqipëri, por është asgjësuar jashtë vendit.
Në lidhje me dokumentacionin dhe faturat, avokati thekson:
- “Inspektorët nuk kanë plotësuar dokumentacion fiktiv.
- Faturat e shqyrtuara ishin me vulë elektronike, të cilat nuk përbëjnë objekt verifikimi nga ana e AKU-së përsa i përket vlefshmërisë fiskale.
- Inspektorët kanë ushtruar vetëm detyrën e tyre për verifikimin e origjinës së produktit dhe më pas e kanë referuar çështjen tek institucionet përkatëse, siç përcakton ligji.”
Avokati i inspektorit Ronaldo Lika thotë se çdo pretendim se inspektorët e AKU-së kanë manipuluar fakte është i pabazuar. Sipas tij, ata kanë vepruar në përputhje me ligjin dhe me kompetencat e tyre, duke ushtruar detyrën me korrektësi dhe duke pasqyruar gjendjen reale të konstatuar në subjekt.
Por, çfarë thotë Prokuroria e Beratit?
Pas veprimeve hetimore dhe procedurale, ka rezultuar se autoritetet kroate kanë konstatuar dhe më pas asgjesuar një sasi prej rreth 8 ton domate e eksportuar nga subjekti “Era-Fruit”, me administrator shtetasin Mariglen Qorri, sasi kjo që pas analizave ka rezultuar me nivel të perparatit “Chlorfenapyr” mbi normat e lejuara, 0.06 mg/kg nga 0.01 mg/kg që duhet të jetë.
Sipas Prokurorisë së Beratit, në lidhje me këtë sasi, ka rezultuar se Mariglen Qorri i “Era-Fruit” ka prerë një faturë blerje fiktive nga një fermer dhe e ka përdorur për praktikat doganore dhe raportin e gjurmueshmërisë të mbajtur nga AKU Berat, duke u munduar të shmangë përgjegjësinë e tij ligjore për produktin që ka prodhuar dhe tregtuar.
Nga veprimet hetimore ka rezultuar se kjo sasi domate e rrezikshme për shëndetin e njerëzve është prodhuar dhe më pas eksportuar nga vetë Mariglen Qorri.
Ndërkohë, sipas organit të akuzës,, nga veprimet hetimore ka rezultuar se inspektorët e AKU-së Berat, Ronaldo Lika dhe Griselda Dokasani, pas njoftimit nga sistemi Rasff, kanë kryer inspektim më datë 29 Gusht 2025 në subjektin “Era Fruit” dhe nuk kanë konstatuar sasinë e domateve të ndodhur në magazinën e subjektit, duke plotësuar praktikën sikur aty nuk gjendej asnjë sasi domateje, duke mos bërë kështu edhe bllokimin dhe marrjen e mostrave për kryerjen e analizave për këtë produkt.
Në njoftimin e Prokurorisë thuhej se këta inspektorë, kanë marrë të mireqenë si të rregullt faturën fiktive të prerë nga Mariglen Qorri i “Era-Fruit”, të pa firmosur nga fermeri/shitësi duke mbajtur mbi bazën e tij raportin e gjurmshmërisë së produktit dhe duke tjetërsuar faktet në lidhje me origjinën e produktit të konstatuar me probleme.
Prokuroria e Beratit thotë se ka sekuestruar dhe marrë disa mostra për analiza të produkteve të ndryshme si domate, speca dhe kastraveca të konstatuara në subjektin “Era Fruit”, produkte këto të dyshuara të kontaminuara.
Kujtojmë se Mariglen Qorri është nën akuzë për veprat penale ‘Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve’, ‘Mashtrimi me produktet ushqimore’ dhe ‘Falsifikimi i dokumenteve’, ndërsa dy inspektorët e AKU-së dyshohen për “shpërdorim detyre”.
