Kryetari i Bashkisë së Vlorës, Ermal Dredha ka dhënë dorëheqjen nga detyra mbrëmjen e kësaj të mërkure.
Lajmi është bërë me dije nga burime për mediat, teksa dorëheqja e Ermal Dredhës vjen vetëm një ditë para mbledhjes së Asamblesë së Partisë Socialiste.
Nuk dihen arsyet konkrete të dorëheqjes, por vlen të theksohet fakti se Ermal Dredha ka qenë kryebashkiaku më i kritikuar nga Edi Rama, madje publikisht edhe në festën e 34-vjetorit të Partisë Socialiste në oborrin e selisë rozë, ku pamjet e “shpërthimit” të kryeministrit ndaj kryebashkiakut bënë xhiron e rrjetit.
E të mos mjaftonte “telendisja” më 19 Qershor, disa ditë më vonë, mëngjesin e 3 Korrikut, Edi Rama i zbarkoi Ermal Dredhës në Bashkinë e Vlorës, ku i bëri një “gjyq” me dyer të mbyllura, teksa të pranishëm ishin edhe deputetët e Qarkut dhe drejtorët e Bashkisë.
Si nxënësin e keq të klasës, Rama e vuri Ermal Dredhën edhe përballë shokëve e shoqeve të tij të partisë, duke iu kërkyer këtyre të fundit që t’ia thonin në sy “të zezat” që ia kishin dërguar atij me mesazh për të.
Dështimi i disa investimeve në Vlorë, mungesa e ujit të pijshëm apo zjarri i përsëritur në fushën e plehrave ishin disa nga çështjet për të cilat Rama akuzonte Ermal Dredhën, teksa në fund të mbledhjes i detyroi të gjithë drejtorët e Bashkisë dhe nënkryetarët që të jepnin dorëheqjen.
Ermal Dredha u zgjodh si kryetar i Bashkisë së Vlorë në zgjedhjet lokale të 14 Majit të vitit 2023, pasi erdhi si diplomat nga Dubai. E pavarësisht se si e promovonte në atë kohë, në dy vite duket se Ermal Dredha i ka sjellë shumë zhgënjim Edi Ramës.
Por, duket se Vlora është një “bashki” e mallkuar për Edi Ramën, pasi Ermal Dredha është i treti në radhë, i cili shënjestrohet publikisht nga kryeministri. Të njëjtën histori ka patur edhe Dritan Leli, si dhe Shpëtim Gjika.
ZGJEDHJE TË PJESHME LOKALE NË TETOR
Nesër, në mbledhjen e Asamblesë së PS-së, Edi Rama veç shpalljes së Qeverisë së re, pritet të shpallë edhe zgjedhjet e pjeshme lokale në disa Bashki.
Prej muajit maj, tre bashki të vendit, Tepelena, Berati dhe Mati, kanë mbetur pa kryetar, pasi të zgjedhurit e tyre lanë postin për të hyrë në Parlament. Deri më sot, drejtimi është marrë përsipër nga nënkryetarët e komanduar.
Kodi Zgjedhor i jep të drejtën Presidentit të Republikës të caktojë datën e zgjedhjeve, por vetëm pasi të njoftohet nga qeveria për vakancat. Ligji nuk parashikon një afat për këtë njoftim, çka e ka zgjatur procesin. Gjithsesi, duket se pritjes i ka ardhur fundi dhe nesër pritet që Qeveria të shpall edhe vakancat në këto bashki.
Tepelenës, Beratit dhe Matit, tashmë iu bashkua edhe Vlora dhe burime për mediat bëjnë me dije se socialistët kanë filluar prej kohësh përgatitjet për këto zgjedhje dhe burime për mediat bëjnë me dije se socialistët kanë planifikuar që t’i mbajnë në muajin Tetor.
Pasi Qeveria të njoftojë zyrtarisht presidentin për vakancat, kreu i shtetit më pas duhet të caktojë datën brenda 48 orëve. Zgjedhjet do të mbahen jo më herët se 30 ditë dhe jo më vonë se 45 ditë nga ky moment.
Veç 4 bashkive të mësipërme, në zgjedhje pritet të shkojë edhe Bashkia e Tiranës, e cila prej muajit shkurt është pa kryetar, pasi Erion Veliaj u arrestua me urdhër të SPAK.
Sipas raportimeve mediatike, zgjedhjet në këtë Bashki, Edi Rama pritet t’i shpallë pikërisht në Asamblenë e PS-së, e duket se ka patur koherencë edhe me SPAK-un, i cili sot njoftoi zyrtarisht dërgimin e dosjes ndaj Erion Veliajt në gjyq me 13 akuza ndaj kryebashkiakut.
E duket se marrja si i pandehur nga SPAK, do të përdoret nga Edi Rama nesër në Asamble për të shpallur zgjedhje të reja edhe në Tiranë.
