Janë bërë virale disa pamje nga festa e 34-vjetorit të Partisë Socialiste në oborrin e selisë rozë, ku Edi Rama e festoi pasditen e sotme, pasi më 12 Qershor ndodhej në New York për të marrë pjesë në dasmën e Alex Soros.
Protagonistës e pamjeve janë vetë Edi Rama dhe kryetari socialist i Bashkisë së Vlorës, Ermal Dredha. Siç shihet edhe në videon e mëposhtme, ndryshe nga të tjerët të cilët i takoi me buzëqeshjen, duket se “punët” me Ermal Dredhën, Rama nuk i ka patur aspak mirë.
Pavarësisht kamerave dhe njerëzve të tjerë, kryeministri nuk është treguar aspak i kursyer me kritika ndaj Ermal Dredhës, edhe pse regjia i la në plan vetëm një fragment me disa sekonda, duke ndryshuar plan më pas.
Nëse me të gjithë të tjerët Edi Rama ishte futur në rol me buzëqeshje e batuta sic ndodh në pritje të tilla,për kryetarin e Bashkisë Vlorë, Ermal Dredha, ndodhi ndryshe.
Me siguri kritikat lidhen me situatën problematike të krijuar në mes të sezonit turistik, ku Vlora po përballet me mungesë të ujit, shpesh herë mungesë të energjisë elektrike, si dhe me zjarret e shpeshtë në fushën e mbetjeve duke mbuluar qytetin bregdetar me re të zeza tymi.
Ky nuk është rasti i parë i ballafaqimeve të tilla, gati gati njësoj si ato që Edi Rama kishte dikur me ish-kryebashkiakun e Vlorës, Dritan Lelin.
