26-vjeçari L. P., i arrestuar pak ditë më parë nën akuzën e përdhunimit të një shtetase italiane në Durrës, thotë se nuk mban mend se çfarë ndodhi atë natë.
“Isha nën efektin e lëndëve narkotike dhe nuk mbaj mend se çfarë kam bërë”, citohet të ketë thënë 26-vjeçari.
Megjithatë, Gjykata e Durrësit vendosi të lërë në fuqi masën e sigurisë “arrest me burg” për të riun, i cili rezulton të jetë i martuar dhe baba i tre fëmijëve.
Turistja italiane, 18 vjeçare, ndodhej në Shqipëri për pushime. Sipas informacioneve paraprake, ajo kishte dalë me një grup shoqesh duke qëndruar deri vonë jashtë në një subjekt pranë detit, duke konsumuar edhe alkool. Ndërsa më pas kishte dalë buzë detit, për t’u qetësuar, në shezllonet e një biznesi.
Ajo është pikasur nga 26-vjeçari i cili ka qenë punonjës sezonal në biznesin ku turistet kishin kaluar mbrëmjen.
Sipas dëshmisë së 18-vjeçares italiane, fillimisht i riu i është afruar për t’i folur, kanë biseduar për disa minuta, ndërsa më pas ai ka abuzuar me të, pavarësisht mospranimit të saj dhe thirrjeve për ndihmë.
“E shtyva disa herë, tentova me gjithë forcën time për të mos ta lejuar të kryente marrëdhënie me mua, por ai nuk u ndal. Më zhveshi me dhunë dhe abuzoi me mua”, raportohet të ketë deklaruar 18-vjeçarja.
Sipas hetimeve të deritanishme dëshmia e vajzës përputhet edhe me gjendjen e saj fizike dhe me dëmtimet që i ka shkaktuar 26-vjeçarit gjatë tentativës për ta larguar atë (dëmtime me thonj në duart e tij, fytyrë)
