Një turiste nga Zelanda e Re ka rrëfyer përvojën e saj pasi u pickua nga një nepërkë gjatë një shëtitjeje në Alpet Shqiptare.
Historia e saj është bërë virale në rrjetet sociale, ku ajo publikoi video dhe shpjegoi hap pas hapi se si u përball me situatën deri në mbërritjen e ekipeve të shpëtimit.
Amy, e cila prej rreth tre vitesh e gjysmë jeton në Zelandën e Re, tregon se incidenti ndodhi më 21 qershor, rreth orës 10:19, ndërsa po ecte në një shteg pranë Valbonës. Menjëherë pas kafshimit, ajo filmoi gjarprin për ta identifikuar më vonë dhe njoftoi shërbimin e emergjencës 112. Megjithatë, për shkak të terrenit të thyer dhe vështirësive në komunikim, autoritetet nuk arritën ta lokalizonin menjëherë.
Për të ndihmuar ekipet e shpëtimit, turistja kontaktoi babanë e saj në Australi i cili i kërkoi t’i dërgonte vendndodhjen përmes aplikacionit What3Words në mënyrë që ti ndihmomnte autoriteteve të lokalizonin vendndodhjen përmes aplikacionit WhatsApp. Në të njëjtën kohë, ajo u lidh edhe me pronarin e një bujtine në Shkodër, i cili bashkëpunoi me autoritetet lokale dhe ndihmoi në orientimin e ambulancës drejt vendit ku ndodhej.
Gjatë kohës që priste ndihmën mjekësore, Amy improvizoi gabimisht një turniket me rrobat që kishte me vete, por më pas e hoqi atë dhe vendosi një fashë kompresive mbi plagë, duke ndjekur udhëzimet që mori. Gjithashtu, ajo qëndroi sa më e palëvizshme për të kufizuar përhapjen e helmit në organizëm. Në rrëfimin e saj, turistja shprehet se frika më e madhe ishte fakti që ishte kafshuar nga nepërka me bri, gjarpri më helmues që gjendet në Shqipëri. Pavarësisht dhimbjeve dhe ankthit, ajo vijoi të filmonte çdo moment të ngjarjes, madje duke bërë edhe humor për të ruajtur qetësinë.
Amy tregoi se, në mungesë të sinjalit telefonik, kishte menduar edhe për skenarin më të keq. Për këtë arsye, ajo u bën thirrje të gjithë turistëve që eksplorojnë zonat e thella malore të pajisen me pajisje emergjence si inReach ose Personal Locator Beacon, të kenë në telefonat e tyre aplikacione për ndarjen e vendodhjes si What3Words dhe të qendrojnë gjithmonë të pajisur me një çantë të ndihmës së parë.
Pas gjithë kësaj eksperience, ajo falenderoi të gjithë personat që morën pjesë në operacionin e shpëtimit dhe stafin mjekësor që i ofroi ndihmë. Amy pranoi se ngjarja ishte ndër përvojat më të vështira të jetës së saj, por u shpreh e lehtësuar që gjithçka përfundoi pa pasoja fatale
