Dhjetëra naftëtarë të Bankers Petroleum kanë protestuar sërish këtë të shtunë para zyrave të kompanisë në Marinzë, duke kërkuar një marrëveshje të re që garanton të drejtat e tyre.
Protesta, e organizuar nga sindikata e sektorit të Hidrokarbureve, u zhvillua me pankarta dhe thirrje kundër zgjatjes së kontratës aktuale pa një marrëveshje të re.
“Greva do të thotë se ne nuk punojmë më. Nëse kërkoni kontratë pa na përfshirë ne, nuk do ta keni. Duhet një marrëveshje e re me naftëtarët,” deklaruan ata gjatë tubimit.
Sipas protestuesve, mungesa e transparencës për kontratat ekzistuese dhe pasiguria për të ardhmen i ka shtyrë drejt paralajmërimit për grevë totale nëse kërkesat e tyre nuk merren parasysh.
Deri tani, nga ana e kompanisë Bankers Petroleum nuk ka pasur asnjë reagim, ndërsa sindikata ka paralajmëruar se protesta dhe greva do të ashpërsohen në ditët në vijim.
Dy muaj më parë, Prokuroria e Fierit nisi hetime për skandalin financiar të kompanisë Bankers, ku disa drejtues dhe ish-drejtues u arrestuan për abuzime me miliarda euro të ardhura nga nafta e Patos-Marinzës.
Hetimet kanë zbuluar skema të dyshimta transferimi parash dhe bilance me fitime minimale, pavarësisht xhirimeve kolosale. Megjithatë, dosja ka mbetur në vendnumëro, ndërsa ende nuk janë hetuar bashkëpunëtorët, institucionet shtetërore dhe kompanitë nënkontraktore të përfshira në aferë.
