Ushtria izraelite ka goditur një ndërtesë të lartë në lagjen Rimal të Gazas, pas një paralajmërimi për evakuim. Goditja bëhet pjesë e një faze të re të ofensivës për të marrë kontrollin e qytetit, ku jetojnë mbi 1 milion palestinezë.
Autoritetet shëndetësore palestineze njoftojnë se të paktën 27 persona humbën jetën gjatë sulmeve ajrore në zonat përreth, përfshirë edhe të gjithë anëtarët e një familjeje prej 6 vetash. Ndërtesa e goditur, e njohur si kulla Mushtaha, shërbente si strehë për banorët e zhvendosur nga zonat e tjera të rrezikshme.
Ushtria izraelite deklaroi se ndërtesa përdorej nga militantët e Hamasit për survejim dhe planifikim sulmesh, duke paralajmëruar sulme të tjera “të sakta dhe të synuara” kundër objektivave të grupit në ditët në vijim.
Qeveria izraelite ka shpallur Gaza City “zonë luftarake” dhe ka kërkuar evakuimin e disa pjesëve të qytetit, por shumë banorë janë rikthyer për shkak të mungesës së sigurisë dhe kushteve të vështira të jetesës.
Organizatat ndërkombëtare paralajmërojnë se Gaza po përballet me një krizë humanitare të thellë, ndërsa shtohen thirrjet për armëpushim të menjëhershëm dhe të qëndrueshëm.
