Kryetarja e Komisionit të Medias, Ina Zhupa, ka reaguar pas konferencës së qeverisë për Kodit e ri Penal, duke kritikuar mungesën e ndryshimeve në nenet që sipas saj cënojnë drejtpërdrejt lirinë e medias dhe punën e gazetarëve.
Përmes një postimi në Facebook, Zhupa thekson se gazetarët ndihen të kërcënuar nga dispozitat e Kodit, duke shkruar: “Gazetarët do ndjehen të fyer po nuk i futem në burg; Gazetarët duhen mbajtur nën kërcënim penal; Gazetarët duhet të kenë frikë kur publikojnë lajme për qeverinë dhe për gjykatat.”
Ajo e përshkruan Kodin e ri Penal si një metodë represive dhe një insistim djallëzor për të heshtur dhe kontrolluar gazetarët, të cilat janë totalisht të papranueshme me standardet europiane.
Zhupa nënvizon se riprezantimi i Kodit, i maskuar si një dëgjesë ku nuk u dëgjua askush nga shoqëria civile, nuk ka sjellë ndryshime në qasjen ndaj lirisë së medias.
Ajo thekson se nenet që lidhen me shpifjen, fyerjen, ndikimin në pavarësinë e gjykatës dhe dhënien e informacionit kanë mbetur të pandryshuara dhe vazhdojnë të përdoren si mjet kërcënimi ndaj gazetarëve, duke minuar transparencën dhe kufizuar punën investiguese të mediave.
