Presidenti palestinez, Mahmoud Abbas, dhe rreth 80 zyrtarë të tjerë janë ndaluar të marrin pjesë në sesionin e shtatorit të Asamblesë së Përgjithshme të Kombeve të Bashkuara në New York, pasi SHBA-të u kanë revokuar vizat.
Sekretari amerikan i Shtetit, Marco Rubio, ka konfirmuar vendimin duke deklaruar se janë hequr vizat për zyrtarët e Autoritetit Palestinez dhe të Organizatës për Çlirimin e Palestinës, ndërsa të tjerëve u është mohuar e drejta për të aplikuar.
Ky hap është pjesë e një serie masash të administratës së Donald Trump-it kundër palestinezëve, që përfshin edhe pezullimin e një programi që lejonte fëmijët e plagosur nga Gaza të merrnin trajtim mjekësor në SHBA.
Departamenti i Shtetit theksoi se masa lidhet me “interesat e sigurisë kombëtare” dhe me domosdoshmërinë që “të mbahet përgjegjësi për mosrespektimin e angazhimeve të tyre dhe për minimin e perspektivës së paqes”.
Sipas deklaratës, për t’u konsideruar partnerë të paqes, të dy strukturat “duhet të refuzojnë qartësisht terrorizmin dhe të ndalin nxitjen e dhunës në sistemin arsimor, siç kërkohet nga ligji amerikan.”
Ndërkohë, situata në Gaza ka marrë një tjetër kthesë dramatike.
Izraeli shpalli qytetin e Gazës si “zonë të rrezikshme luftarake” dhe nisi një ofensivë të planifikuar që ka sjellë reagime të ashpra ndërkombëtare. Ministrat e Jashtëm të Islandës, Irlandës, Luksemburgut, Norvegjisë, Sllovenisë dhe Spanjës paralajmëruan se operacionet ushtarake do të shkaktojnë “vdekje të papranueshme të civilëve palestinezë të pafajshëm”.
Qindra mijëra palestinezë ndodhen aktualisht të strehuar në Gaza, duke vuajtur urinë dhe bombardimet e pandërprera. Ambasadori palestinez në OKB, Riyad Mansour, tha se Abbas kishte planifikuar të drejtonte delegacionin dhe të mbante një fjalim në debatet e përgjithshme që nisin më 23 shtator, si dhe të merrte pjesë në një takim të nivelit të lartë për zgjidhjen me dy shtete, të organizuar më 22 shtator nga Franca dhe Arabia Saudite.
Autoriteti Palestinez reagoi duke e cilësuar vendimin e SHBA-ve si “shkelje të angazhimeve ndërkombëtare” dhe një akt që “bie ndesh me të drejtën ndërkombëtare”.
Sipas marrëveshjes së vitit 1947, SHBA-të duhet të garantojnë hyrjen e diplomatëve të huaj në OKB, por Washingtoni ka theksuar se ka të drejtë të refuzojë viza për arsye sigurie, ekstremizmi ose politikë të jashtme.
