Nga Boldnews.al
Drejtuesi i një brigade punëtorësh është arrestuar pak ditë më parë nga Policia e Durrësit, pasi është konstatuar duke kryer ndërtim pa leje për llogari të kompleksit “Tropikal”, një resort turistik që në pronësi të biznesmenit Ardian Takaj.
Inxhinjeri 49-vjeçar S.D. qëndroi për mbi 48 orë në paraburgim, përpara se gjykata e Durrësit të caktonte ndaj tij masën e “detyrimit për paraqitje” në 16 Gusht 2025.
Ndërkohë, Ardian Takaj, familja e të cilit është përfituese e drejtëpërdrejtë e godinës së cilësuar e paligjshme nga Policia dhe një ekspertizë paraprake e Inspektoratit Ndërtimor Urbanistik, është marrë në pyetje nga uniformat blu thjesht si “person në dijeni”.
Ndaj biznesmenit dhe djalit të tij, Gerhard Takaj, drejtues i shoqërisë “FT Management &Events” sh.p.k” që menaxhon pronat e kompleksit, nuk rezulton, të paktën deri më tani, të jetë nisur ndonjë procedim penal nga ana e Policisë së Durrësit.
“Ndërtim i paligjshëm”
Mesditën e 14 gushtit, forcat e Komisariatit të Policisë së Durrësit kanë kryer një kontroll në kompleksin “Tropikal”, në sektorin “Iliria”, në zonën e bregdetit. Gjatë verifikimit është konstatuar se brenda kompleksit po zhvilloheshin punime për ndërtimin e një godine 2-katëshe.
Nga vëzhgimi paraprak, oficerët e Policisë kanë konstatuar se objkekti ishte rreth 240 metra katrorë, i rrethuar me skela metalike. Në brendësi të objektit kishte konstruksione metalike dhe kolona betoni, ndërsa kati i dytë ishte mbuluar me konstruksion metalik dhe panele sanduiç.
Pas këtij konstatimi, punonjësit e policisë kanë pyetur shtetasin S.D., me profesion inxhinier, i cili është pronar dhe administrator i kompanisë “A…” shpk, e cila ishte kontraktuar për të kryer punimet ndërtimore brenda kompleksit “Tropikal”.
Ai sqaroi se kishte marrë përsipër punime rifiniture, rikonstruksioni dhe termoizolimi të godinave ekzistuese, mbi bazën e një njoftimi punimesh të lëshuar nga Njësia Administrative nr. 5, Bashkia Durrës.
Sipas tij, punimet e kryera nuk kishin tejkaluar objektin e dakordësuar dhe nuk kërkonin pajisje me leje ndërtimi, pasi hynin në kategorinë e ndërhyrjeve që nuk sjellin rritje të volumit ndërtimor. Ai shtoi se ditën e konstatimit, në objekt ndodheshin tre-katër punëtorë të punësuar prej tij, të cilët po kryenin punime mirëmbajtjeje dhe suvatimi.
Ardian Takaj: Nuk është ndërtim pa leje
Në kuadër të hetimit paraprak, shërbimet e policisë gjyqësore kanë pyetur në cilësinë e personit që ka dijeni për veprën penale shtetasin Ardian Takaj, i cili është babai i shtetasit Gerhard Takaj, administratori i Shoqërisë “Tropikal SM & FT”sh.p.k, që rezulton pronare e objektit në fjalë.
Biznesmeni Takaj, i njohur edhe si president i klubit të futbollit “Skënderbeu” të Korçës, ka deklaruar se “ndërhyrjet dhe punimet e kryera në objektin në fjalë ishin rrjedhojë e njoftimit të punimeve nr. 1019, datë 02.12.2024, të cilat kishin si qëllim ruajtjen dhe rritjen e efikasitetit tës trukturave ekzistuese, zëvendësimin dhe riparimin e mbulesës së çatisë, si dhe ndërhyrje në riparimin dhe zëvendësimin e pajisjeve të amortizuara në godinat ekzistuese”.
Takaj ka deklaruar para oficerëve të Policisë se godinat kanë ekzistuar që para viteve ’90 dhe kanë kaluar në pronësi të Shoqërisë “Tropikal SM&FT”sh.p.k, shoqëri e krijuar më 01.12.2024, me ortakë Sindikatën e Pavarur të Minatorëve të Shqipërisë (20% të aksioneve) dhe Shoqërinë “FT Management &Events” sh.p.k, (80% të aksioneve).
Biznesmeni ka shtuar se godinat ishin të amortizuara dhe ishte kërkuar kryerja e punimeve që nuk shtonin volum në ndërtim dhe për të cilat nuk ishte e nevojshme leja e ndërtimit.
IMT rrëzon Takaj
Në kuadër të hetimit paraprak, është administruar në cilësinë e provës dokumentare “akti i konstatimit” nr.9, datë 14.08.2025 i Inspektoratit të Mbrojtjes së Territorit pranë Bashkisë Durrës.
Në atë akt thuhet se ndërtimi është kryer pa lejen përkatëse të organeve kompetente. Inspektorët Ndërtimorë kanë vlerësuar se “ndërtimi i kryer ka një sipërfaqe totale prej 1630m², i realizuar me konstruksione betoni dhe hekuri, si dhe me panele sanduiç metalike. Ky ndërtim, me destinacion biznesi dhe përfitimi, se është kryer pa dokumentacion të vlefshëm ligjor dhe pa lejen përkatëse të ndërtimit”.
Me këtë akt-konstatimi në dorë, oficerët e Policisë së Durrësit kanë vepruar me arrestimin në flagrancë të inxhinierit S.D, nën dyshimet se ka konsumuar veprën penale të “Ndërtimit të paligjshëm”, për qëllime përfitimi, parashikuar nga neni 199/a, paragrafi 3 i Kodit Penal.
“Tolerohen” pronarët
Neni, mbi bazën e të cilit është arrestuar dhe më tej u vendos nën masën “detyrim për paraqitje” inxhinieri që po kryentë ndërtim të dyshuar të paligjshëm në kompleksin turistik “Tropikal”, parashikon se: “….kjo vepër, e kryer në tokën publike ose shtetërore apo në tokën e tjetrit, dënohet me burgim nga një deri në pesë vjet”.
Pra, në rastin konkret, Policia që ka kryer veprimet fillestare, e më tej prokuroria që ka përcjell rastin në gjykatën e Durrësit, kanë krijuar dyshimet e arsyeshme se sipërmarrësi ndërtimor S.D. ka realizuar “punime në tokën e tjetrit, pa lejen përkatëse ndërtimore”.
Por, institucionet ligjzbatuese, të paktën deri në këtë fazë të hetimit, nuk kanë sqaruar dhe, rrjedhimisht as nuk kanë evidentuar ndonjë shkelje penale nga investitori i punimeve, pra nga drejtuesit e kompleksit “Tropikal”, Ardjan dhe Gerhard Takaj, megjithëse këta të fundit, jo vetëm kanë lejuar, por edhe kanë porositur atë që, më pas u konstatua si “ndërtim i paligjshëm”.
Qasja “tolerante” ndaj investitorëve, të cilët janë zbuluar në shkelje të ligjit penal për ndërtimet pa leje, duket se është shndërruar në një rutinë për institucionet ligjzbatuese.
“Boldnews.al” ka raportuar më herët se investitorët e të paktën tre resorteve turistike në zonën e Dhërmiut, nuk kanë pësuar asnjë sanksion penal, megjithëse janë konstatuar duke kryer ndërtime të paligjshme.
Në çdo rast, Policia ka vepruar me forcën e ligjit vetëm ndaj inxhinierëve zbatues, pa shkuar më tej tek sipërmarrësit dhe investitorët, të cilët, janë përfituesit fundorë të atyre punimeve.
LEXO EDHE:
Beton pa leje në Jug/ Aksioni i Ramës amniston “oligarkët” me duart e prokurorisë
Kompeks pa leje në Dhërmi/ Policia “shpëton” Klaudio Rikon e “Olea”, arreston inxhinierin
