Nga Boldnews.al
Në Mars të vitit 2021, Këshilli i Rregullimit të Territorit, nën drejtimin e kryeministrit Edi Rama, miratoi lejen e zhvillimit për struktura hoteliere deri në 6 kate, me investitor shoqërinë “Jala Investment”.
Kompania, me aksioni “Andi” shpk të Andi Gjiknurit dhe “AIG” shpk, me pronar Jonian Antoni, i njohur më së shumti si bosi i shoqërisë së imobiliareve ‘Centuri 21”, e nisën projektin e tyre me dyshime të forta publike.
Një raportim i zgjeruar ngrinte dyshime se projekti i “Jala Investment”, një investim me një total prej 120 dhoma, ishte ndërtuar mbi prona të paligjshme ose me status të paqartë.
Këto pretendime u mohuan nga administratori i shoqërisë “Jala Investment”, Saimor Broka. Në një reagim publik, ai sqaronte se projekti ndërtimor po zhvillohej në prona të blera nga aksioneri ‘Aig” shpk dhe se investimi financiar po kryhej nga aksioneri tjetër, “Andi” shpk.
Katër vjet pas dyshimeve dhe sqarimeve, “Jala Investment” shpk gjendet në telashe ligjore. Kësaj radhe jo nga raportimet mediatike, por nga institucionet ligjzbatuese. Arsyeja e telasheve-kompania po zhvillon projektin pa leje ndërtimi në fuqi.
Megjithatë, i penalizuari i vetëm për këtë paligjshmëri flagrante është inxhinieri zbatues, njëlloj siç ka ndodhur në rastet e raportuara më herët nga “Boldnews.al” për investimet “The Velt” të kompanisë “Halisof” dhe “Folie Village” të shoqërisë “Soleil & Sea”.
Në 3 Qershor 2025, Policia e Vlorës arrestoi në flagrancë inxhinierin zbatues të projektit “Jala Investment”, Klarens C., nën dyshimet se ka kryer veprën penale të “ndërtimit të paligjshëm” për qëllime përfitimi, parashikuar nga neni 199/a/4 i Kodit Penal.
Policia, e ndihmuar edhe nga inspektorët ndërtimorë vendorë të Bashkisë së Vlorës, kanë arritur në konkluzionin se projekti i “Jala Investment” po zhvillohet pa leje ndërtimi të vlefshme.
Inxhinieri 40-vjeçar u paraqit para gjykatës në 6 qershor 2025 dhe ndaj tij u caktua masa e sigurimit “detyrim për paraqitje”. Klarens C. është i vetmi punonjës i “Jala Investment” i konsideruar përgjegjës deri më tani për shkeljen penale, ndërkohë që ai, në cilësinë e inxhinierit zbatues, ka marrë porosi nga administratori i shoqërisë, si edhe punimet po i kryente me shpenzimet e investitorit.
Të gjithë personat mbi inxhinierin 40-vjeçar duhet të kenë ditur se punimet po zhvilloheshin pa leje ndërtimi aktive. Por, policia, e më tej Prokuroria e Vlorës, kanë vlerësuar që të godasin vetëm hallkën e fundit të zinxhirit drejtues.
“Jala Investment”, ndërtim pa leje
“Boldnews.al” ka siguruar dosjen e Prokurorisë së Vlorës, mbi të cilin gjykata ka caktuar masën e sigurimit për inxhinierin zbatues.
Sipas akteve hetimore, rezulton se punonjësit e Policisë së Vlorës kanë shkuar në 3 qershor 2025 në kantierin e kompanisë “Jala Investment”, në zonën e Jalës, në bregdetin e Dhërmiut, pjesë e bashkisë së Himarës.
Nga ana e oficerëve të policisë gjyqësore është bërë këqyrja e vendit të ngjarjes, e cila ndodhet në fshatin Jalë të Bashkisë Himarë, ku objekt këqyrje është një kantier ndërtimi i firmës “Jala Investiment” shpk.
Kantieri ndodhet në kodër buzë rrugës, në krahun lindor që të çon për në plazhin Jalë dhe është i rrethuar me profile hekuri, ku dallohen reklama të vilave që ndodhen brenda tij.
Buzë rrugës gjenden të ndërtuara në vijë të drejtë njëri pas tjetrit 6 (gjashtë) pallate me 5 (pesë) dhe 6 (gjashtë) kate, ku një kat është nën tokë, si pasojë e relievit të pjerrët.
Brenda kantierit gjenden materiale ndërtimi si hekur, skela metalike, si dhe një vinç kullë për ngjitjen e materialeve të ndërtimit në lartësi. Sipër pallateve të përshkruara gjenden dhe pesë troje të hapura, ku në njërin prej trojeve është ndërtuar një objekt me dy kate, në fazën e betoneve. Në jug-perëndim të kantierit ka një rrethim me kangjella hekuri dhe sanduiç, ku në to janë të reklamuara objektet në ndërtim.
Pas verifikimit në terren, forcat blu të Krimit Ekonomik të Vlorës kanë pyetur inxhinierin zbatues mbi dokumentacionin e punimeve.
40-vjeçari Klarens C. ka deklaruar se firma ka pasur një leje ndërtimi, të miratuar në 16 janar 2024. Rreth 3 muaj më pas, e konkretisht në 29 Mars 2024, kompania ka aplikuar për rishikimin e kushteteve të lejes së ndërtimit. Por, siç deklaron ai, nuk është marrë ende përgjigje nga Agjencia për Zhvillimin e Territorit (AZHT), struktura përgjegjëse për nxjerrjen e lejeve përkatëse.
Në kushtet, kur kërkesa për rishikimin e lejeve ende nuk kishte marrë përgjigje, ndërkohë që punimet në kantier vijonin pa ndërprerë, forcat policore kanë vlerësuar se “vazhdimi i punimeve pa u zbardhur leja e dytë konsiderohet ndërtim i paligjshëm”.
Mbi bazën e këtij konstatimi, është kryer arrestimi në flagrancë i inxhinierit zbatues për veprën penale të “ndërtimit të paligjshëm me qëllime përfitimi”, pavarësisht se nuk bëhet e qartë se ku është përfitimi i punonjësit të “Jala Investment”, në një kohë që investitorët, pra edhe përfituesit e drejtëpërdrejtë, janë dy ortakët e shoqërisë ndërtuese.
Tre ditë pas arrestimit, gjykata e Vlorës vendosi që inxhinieri, me banim në Tiranë, të paraqitet çdo muaj para oficerit të Policisë Gjyqësore, deri në mbylljen e plotë të hetimeve.
LEXO EDHE:
Kompeks pa leje në Dhërmi/ Policia “shpëton” Klaudio Rikon e “Olea”, arreston inxhinierin
