Deputeti I PD-së, Gazment Bardhi, ka reaguar pas deklaratave të kryeministrit Edi Rama, i cili akuzoi KLGJ-në se nuk po garanton cilësinë e drejtësisë.
Në një postim në rrjetet sociale, Bardhi theksoi se roli i KLGJ nuk është të mbrojë politikën, por të luftojë bandat dhe korrupsionin. Ai akuzoi Ramën se, në vend që t’i luftojë ato, i ka ulur në qeverisje përmes tenderave, koncesioneve dhe lejeve të ndërtimit.
“Është për të luftuar bandat, jo për t’i ulur në qeverisje. Është për t’i shkatërruar ekonomikisht, jo për t’u dhënë licenca e tendera. Është për të luftuar korrupsionin, jo për ta ligjëruar atë me projekte si inceneratorët që nuk ekzistojnë. Është për t’u gjykuar nga prokurorët e gjykatësit, jo për t’i gjykuar ai ata,” – shkruan Bardhi.
Demokrati theksoi se Rama nuk ka të drejtë të ndërhyjë apo të komentojë vendime gjyqësore, duke kujtuar se një gjë e tillë nuk ndodh në asnjë vend të Bashkimit Europian.
Postimi i kryetarit të Grupit Parlamentar të PD, Gazment Bardhi:
Edi Rama përpara se të “shtrembërojë” nga padija e thellë rolin e KLGJ, bën mirë të kuptojë rolin e tij:
– Është për të luftuar bandat, jo për ti ulur në qeverisje; ose je
– Është për ti shkatërruar ekonomikisht bandat, jo për ti dhënë licenca, tendera, koncesione apo leje ndërtimi;
– Është për të luftuar korrupsionin, jo për të ligjeruar atë përmes projekteve si inceneratorët që nuk ekzistojnë;
– Është për tu gjykuar nga prokurorët e gjykatësit; jo për ti gjykuar ai ato!
Prandaj bën mirë që përpara se të gjykojë gjyqtarë e prokurorë që nuk i vijnë pas avazit apo humorit të tij, të kujtohet se asnjë Kyeministër në Europë, nuk komenton e jo më të sulmojë gjyqtarë e prokurorë specifik për çështje specifike.
Dhe boll harxhoi kohën me çështje që as i kupton dhe as mundet ti kuptojë, sepse Edi Rama është gatur si “antiligji” dhe “anti interesi publik”!
