Granit Sokolaj nga Qendra Alert ka publikuar listën e punonjësve/inspektorëve të AKU që do të testohen nesër, më 29 gusht, në kuadër të provimeve “të vjeshtës” në UBT dhe forcimit të kapaciteteve të AKU.
Sokolaj e cilëson testimin si të paligjshëm, pasi rekrutimet e gjithçka tjetër në lidhje me inspektorët bëhen bazuar në Ligjin 99/2024 “Për Inspekttimin” dhe jo me urdhëra, udhëzime apo dëshira.
Megjithatë, në listë ka diçka edhe më të çuditshme. Në pjesën e listës së pjesëmarrësve në testim për kryeinspektorët, lista ka 11 emra, ku është përfshirë dhe drejtori i përgjithshëm. Por, duhet të ishin 13 emra, sepse AKU ka 12 drejtorë rajonal dhe “gjenerali” në krye, bëjnë 13. Mungojnë 2, drejtori i Korçës dhe ai i Lezhës.
Sokolaj zbulon se pasi u interesuan, mësuan se “ata janë të komanduar në detyrë dhe jo të emëruar dhe për këtë arsye, ata do të futen në testim si inspektorë, pra në detyrat që kanë pasur para komandimit”.
Por, në listën e kryeinspektorëve, të komanduar janë dhe drejtori i përgjithshëm dhe drejtori rajonal i Tiranës (me ngjyre të verdhë). Rajonalët tjerë me jeshile janë të emëruar.
“Po këta të dy pse do futen në testim si kryeinspektorë dhe jo si tjerët, në varesi të postit që mbanin para komandimit? Sepse nuk janë të emëruar, por të komanduar. Apo Korça dhe Lezha janë “larg detit, larg mbretit” dhe këta dy do të konfirmohen në detyrë, nesë e kalojnë testimin dhe nëse kanë kaluar fazën e parë të shqyrtimit të dosjeve (enigmë) si kryeinspektorë, ndërkohë që janë të komanduar njësoj si 2 kolegët e tyre?!”– shprehet Sokolaj duke ngritur pikëpyetje se pse po favorizohen drejtori i përgjithshëm dhe drejtori rajonal i Tiranës.
Me nota ironie ai shprehet më tej se “pyetjet i bëj për nje shokun tim pedagog ne UBT e që është në komision, por jo në listën e të hetuarve nga SPAK dhe që nuk di si t’i vleresojë”.
