Policia e Shkodrës ka proceduar penalisht në gjendje të lirë drejtuesin e automjetit, i cili shkaktoi një aksident mbrëmjen e djeshme duke përplasur një efektiv policie. Bëhet fjalë për shtetasin B. N, 61 vjeç, për veprën penale “Shkelja e rregullave të qarkullimit rrugor”.
Rreth orës 21:00, në lagjen “Partizani”, ai përplasi efektivin e policisë, shtetasin P. K., 60 vjeç, i cili ishte duke kaluar në vijat e bardha ku po shkonte në punë për të marrë turnin e tretë.
Efektivi i policisë mbeti i plagosur dhe ndodhet tek spitalin e Traumës në Tiranë, për trajtim mjekësor më të specializuar dhe raportohet se është jashtë rrezikut për jetën
“Në vijim të informacionit të dhënë dje, për aksidentin në lagjen “Partizani”, u referuan materialet në Prokurori, ku nisi procedimi penal për shtetasin B. N, 61 vjeç, për veprën penale “Shkelja e rregullave të qarkullimit rrugor”.
Procedimi nisi pasi ky shtetas duke drejtuar automjetin e tij, dyshohet se ka humbur kontrollin mbi drejtimin e automjetit dhe si pasojë, ka përplasur shtetasin P. K., 60 vjeç, punonjës policie, i cili ishte duke kaluar në vijat e bardha duke shkuar për të marrë shërbimin. Si pasojë shtetasi P. K., ndodhet në Spitalin e Traumës Tiranë, për trajtim mjekësor më të specializuar, jashtë rrezikut për jetën.”-njofton policia.
