Një faqe tjetër e dhimbshme në historinë e futbollit italian u mbyll sot: SPAL është zyrtarisht klub i falimentuar. Klubi nga Ferrara, që dikur kishte njohur edhe lavdinë e Serisë A, nuk do të jetë më pjesë e sistemit profesionist të futbollit italian.
Pas mosregjistrimit në kampionatin e Serisë C në qershor, gjykata e ka shpallur falimentin, duke i dhënë fund një epoke.
Pjesë e SPAL-it pë dy sezone gjatë viteve 2019-2021 ka qenë portieri i Kombëtares Shqiptarë, Etrit Berisha, duke zhvilluar 51 ndeshje me këtë ekip në kampionatin italian.
Gjykatësja Anna Ghedini vendosi sot likuidimin gjyqësor të shoqërisë Spal Srl, pronë e Joe Tacopina dhe Marcello Follano. Një kujdestar falimentimi është caktuar për të administruar një borxh që, sipas vlerësimeve, kap shifrën e mbi 10 milionë eurove, të shpërndarë mes lojtarëve, furnitorëve dhe punonjësve.
Tashmë, emri dhe logoja historike e klubit do të nxirren në ankand, për të shlyer pjesërisht borxhet dhe për të hapur një faqe të re, ndonëse pa lidhje të drejtpërdrejtë me të kaluarën e ndritur të klubit.
Në vend të SPAL-it, është krijuar një shoqëri e re me emrin “Ars et Labor”, e cila është regjistruar për të marrë pjesë në kampionatin e Eccellenza, kategoria e pestë e futbollit italian. Megjithatë, klubi i ri nuk ka të drejtë të përdorë për momentin as logon dhe as emrin “SPAL”.
Ndeshja e fundit zyrtare e SPAL-it mbetet playout-i i Lega Pro ndaj Milan Under-23, afro tre muaj më parë, një takim që vulosi rënien e ekipit të të rinjve të kuqezinjve dhe, indirekt, shënoi fundin e një historie të gjatë për klubin nga Ferrara.
Një tjetër klub historik që zhduket nga skena, mes krizash financiare, drejtimit të gabuar dhe mungesës së mbështetjes. Ferrara do të nisë nga e para, me shpresën për t’u ringjallur në vitet që vijnë./Gazetta dello Sport
