Organizatat e dala nga lufta e Ushtrisë Çlirimtare të Kosovës kanë paralajmëruar një protestë të madhe për ditën e enjte, në shenjë kundërshtimi ndaj vendimeve të fundit të Gjykatës Speciale në Hagë. Njoftimi u bë në një konferencë për media, ku u theksua se janë marrë të gjitha masat për mbarëvajtjen e protestës.
Gazmend Syla, përfaqësues i Organizatës së Veteranëve të Luftës, tha se protesta do të mbahet të enjten në orën 17:00 në sheshin “Skënderbeu” në Prishtinë dhe janë njoftuar të gjitha institucionet përkatëse, përfshirë Komunën, Policinë e Kosovës dhe shërbimet emergjente.
Sipas tij, protesta është reagim i drejtpërdrejtë ndaj faktit që Gjykata Speciale ka pranuar si dëshmi dokumente nga tri institucione shtetërore të Serbisë — veprim që veteranët e konsiderojnë të papranueshëm.
“Për ne është e papranueshme që sot bashkësia ndërkombëtare, përmes Gjykatës Speciale, i legjitimon këto institucione, ndonëse tre krerët e tyre janë dënuar për krime lufte nga gjykatat ndërkombëtare. Ky veprim cenon historinë dhe themelet e shtetndërtimit tonë,” – deklaroi Syla.
Ai shtoi se përveç protestës së nesërme, priten edhe protesta të tjera në vijim, si pjesë e një fushate të vazhdueshme në mbështetje të bashkëluftëtarëve që po gjykohen në Hagë.
Në protestë pritet të marrin pjesë figura të njohura publike dhe politike, mes tyre profesoresha universitare Nevenka, ish-kreu i OVL-UÇK-së Hysni Gucati, kryetari i BDI-së Ali Ahmeti dhe një përfaqësues i familjeve të dëshmorëve.
Haga zgjat periudhën e paraburgimit për ish-presidentin Hashim Thaçi, gjykatësi: Mund të arratiset
