Partizani ka rikthyer në ekip sulmuesin Victor Da Silva. Braziliani, i cili fitoi titullin me “demat” në vitin 2023, ka vendosur të rikthehet te kryeqytetasit.
Klubi i Partizanit ka njoftuar se palët kanë firmosur kontratë për një vit, me mundësi rinovimi për një tjetër sezon.
30-vjeçari është bashkuar menjëherë me ekipin në stërvitje, për të qenë gati për sezonin e ri. Braziliani e njeh mirë kampionatin, pasi përveç Partizanit ka luajtur edhe me Vllazninë e Bylisin.
Njoftimi i Partizanit:
“FK Partizani ka kënaqësinë të njoftojë rikthimin e Victor Da Silva në familjen e kuqe.
Pas aventurës së suksesshme në sezonin 2022-2023, ku kontribuoi në fitimin e titullit të 17-të kampion të Shqipërisë, sulmuesi brazilian riveshë fanellën e kuqe.
Da Silva ka nënshkruar një kontratë 1+1 dhe sot i është bashkuar grupit në seancën e radhës stërvitore”, thuhet në njoftimin e klubit.
