Ilir Meta ka reaguar, pasi SPAK mbylli zyrtarisht hetimet paraprake ndaj tij dhe ditën e sotme i komunikoi akuzat në prani të avokatit, teksa dosja pritet të dërgohet për gjykim.
Ai është marrë i pandehur për veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Në një postim në rrjetet sociale, Meta përshëndet mbylljen e hetimeve, të cilat i konsideron si fabrikime të nisura që prej vitit 2019.
Ai thotë se kanë ngritur me forcë kërkesën për të hetuar se kush ka bërë pagesa të paligjshme për llogari të LSI-së për kompanitë në SHBA dhe se kujt i dërgonin faturat për t’u aprovuar në Partinë e Lirisë, kompania GSIS. Sipas Metës, moshetimi në këto dy drejtime është vetëm pasojë e një diktati politik.
“Përshëndes mbylljen zyrtare të hetim-fabrikimeve të nisura që në Dhjetor 2019.
Asgjë e re nga takimi i fundit më 27 Maj me prokurorët e SPAK-ut.
Ngritëm me forcë dhe zyrtarisht kërkesën për të hetuar me përgjegjshmëri se kush ka bërë pagesa të paligjshme për llogari të LSI-së për kompanitë në SHBA dhe së dyti se kujt i dërgonin faturat për t’u aprovuar në Partinë e Lirisë, kompania GSIS.
Mos-hetimi në këto dy drejtime është vetëm pasojë e një diktati politik, pasi nga ana ligjore dhe profesionale kjo është gjëja më e thjeshtë që mund të bëhet dhe që duhet të ishte bërë prej dy vitesh.” – shkruan ish-presidenti..
Ilir Meta u arrestua më 21 tetor 2024 në lidhje me hetimet e Prokurorisë së Posaçme, e cila ka bashkuar në një dosje të vetme çështjen CEZ-DIA, lobimin në SHBA të ish-LSI-së, si dhe hetimin pasuror ndaj tij dhe bashkëshortes së tij, Monika Kryemadhi.
