Kryeministri Edi Rama ka zgjedhur sërish ironinë për t’u përgjigjur kritikave që shoqërojnë draftin e ri të Kodit Penal. Në një postim në rrjetin social “X”, ai i cilësoi “të alarmuar” ata që kundërshtojnë ndryshimet ligjore, duke u sugjeruar të “mos ekspozohen shumë në diell”.
“Drafti i ekspertëve të nderuar të fushës është prezantuar publikisht për të mbledhur në mënyrën më demokratike dhe transparente të mundshme të gjitha opinionet rreth tij,” shkruan Rama.
Kryeministri shkruan se problemi nuk është vetë drafti, por masa domethënëse e atyre që përdorin lirinë vetëm për të bërë sherr.
Reagimi i plotë:
Të alarmuarit nga drafti i Kodit të ri Penal dhe gojëmbyllja me ligj e forcave liridashëse politike dhe mediatike, mbase duhet të kujdesen që të mos ekspozohen shumë në diell, ndërkohë që drafti i ekspertëve të nderuar të fushës është prezantuar publikisht pikërisht për të mbledhur në mënyrën më demokratike dhe transparente të mundshme të gjitha opinionet rreth tij.
Hëpërhë problem më serioz që ka liria në Shqipëri nuk është as regjimi, as drafti i kodit të ri jo e jo, po masa domethënëse e atyre që e përdorin lirinë vetëm për të bërë sherr e shamata për mungesën e saj
Por ndërsa Rama i quan shqetësimet “sherr e shamata”, aktorët ndërkombëtarë që ndjekin procesin ligjor në Shqipëri shprehin qëndrime shumë më serioze.
Bashkimi Europian, përmes Zyrës së Delegacionit në Tiranë, ka shprehur kundërshtime të forta ndaj draftit të propozuar. Në një reagim të detajuar, Delegacioni thekson se ndryshimet e propozuara nuk janë në përputhje me standardet europiane dhe kanë potencial të ndikojnë negativisht mbi të drejtat e qytetarëve, lirinë e shprehjes dhe lirinë e medias.
Delegacioni i BE-së shton se nuk ka qenë pjesë e grupit që hartoi draftin dhe se kërkon një konsultim gjithëpërfshirës me institucionet kryesore të drejtësisë dhe shoqërinë civile për të garantuar cilësinë më të lartë të legjislacionit, duke e lidhur këtë me angazhimet e Shqipërisë në negociatat për anëtarësim.
“Bashkimi Evropian është në dijeni të shqetësimeve serioze të ngritura nga përfaqësues të sistemit të drejtësisë dhe shoqërisë civile dhe presim që këto shqetësime të adresohen në kuadër të procesit të konsultimit,” thuhet në reagim.
Ndërkohë, OSBE-ja në Shqipëri ka distancuar veten nga ky proces, duke bërë të ditur se nuk ka qenë pjesë e grupit të punës që ka hartuar draftin dhe duke theksuar se ndryshimet në Kodin Penal janë një çështje themelore që kërkon kohë dhe konsultime gjithëpërfshirëse.
Kjo e fundit po shqyrton draftin dhe është e gatshme të ofrojë rekomandime për përmirësimin e tij, në përputhje me mandatet për forcimin e institucioneve demokratike dhe shtetit të së drejtës.
Kodi i ri Penal/ Reagon edhe OSBE: Nuk na është marrë mendimi për draftin
Kodi i ri Penal/ BE: Jemi të shqetësuar, disa nene nuk janë në përputhje me standardet europiane
