Bisedimet për transferimin e Ardon Jasharit drejt Milanit janë bllokuar dhe Club Brugge ka vendosur të mos heqë dorë nga mesfushori shqiptar, të paktën për momentin. Belgët e kanë përfshirë zyrtarisht 23-vjeçarin në listën e skuadrës për raundin tjetër të Champions League, ku më 6 gusht do të përballen me Salzburgun.
Ky vendim shihet si një sinjal i qartë për Milanin, që ka ndjekur nga afër Jasharin për javë të tëra, por pa arritur një marrëveshje me klubin belg. Vetë lojtari ka shprehur dëshirën për të bërë hapin e madh në karrierë, por për momentin Brugge nuk e ka ndërmend të heqë dorë lehtësisht.
Edhe pse është përfshirë në listën e UEFA-s, mbetet për t’u parë nëse Jashari do të zbresë në fushë kundër Salzburgut. Ai u la jashtë skuadre në sfidën e parë të kampionatit belg ndaj Mechelen, duke rritur dyshimet për një largim të mundshëm.
Takim mes palëve
Edhe pse Jashari është bërë pjesë e listës për ndeshjet e Champions, mediet belge bëjnë me dije se këtë fundjavë do ketë një takim mes tij dhe klubit për të diskutuar nga pranë. Brugge kishte dhënë fjalën se do e linte të lirë për një ofertë deri në 32.5 milionë euro, por diçka e tillë nuk ka ndodhur. Milani ofron 33.5 milionë euro dhe 5 mln të tjera si bonuse.
I lindur në vitin 2002, Jashari ka rënë në sytë e disa klubeve europiane, por Milani është ai që ka shfaqur interesin më konkret. Club Brugge ende nuk e ka dhënë dritën jeshile sepse është i tunduar nga oferta të tjera, më bujare, kryesisht ajo e klubit arab Neom, i cili thuhet se ka ofruar 45 milionë euro. Një ofertë prej 40 milionë eurosh ka mbërritur nga Anglia dhe Bayer Leverkusen është gjithashtu i interesuar për Jasharin.
