Një banore e njësisë nr. 2 të Tiranës ka ngritur një ankesë në redaksi për përkeqësimin e menaxhimit të plehrave në rrugën “Dalip Zavalani”, ku koshat e plehrave nuk po mblidhen çdo natë si më parë, por vetëm një herë në dy ditë.
Kjo ka sjellë grumbullimin e plehrave në rrugë, duke krijuar kushte të papërshtatshme, veçanërisht në verë, kur temperaturat e larta shkaktojnë erë të keqe dhe përhapje të mushkonjave. Banorja thekson se kjo rrezikon shëndetin e tyre.
Situata po prek jo vetëm ata që jetojnë pranë kazanit të plehrave, por edhe gjithë lagjen, pasi aroma e keqe është e padurueshme dhe dritaret nuk mund të hapen. Banorja kërkon ndërhyrjen urgjente të autoriteteve në pastrimin e lagjes.
Ajo thekson se nuk është normale që të jetosh mes plehrave në vitin 2025 dhe se kjo situatë është një shqetësim shëndetësor për të gjithë banorët. Aplikimi i një zgjidhjeje urgjente është kërkesa kryesore e banorëve të zonës.
Denoncimi i banores: “Jam një banore e njësisë nr.2 në Tiranë, rruga Dalip Zavalani, në bllokun e pallateve të minibashkia 2. Kohët e fundit është bërë shumë shqetësuese situata e plehrave në lagje për faktin se koshat nuk boshatisen çdo ditë (pra në mbrëmje). Vijnë punëtorët e bashkisë dhe i mbledhin çdo natë plehrat. Kjo gjë nuk po ndodh më. Janë duke ardhur njëherë në dy ditë. Nuk është aspak normale që tani në verë, aq më tepër me temperaturat e larta, përveç faktit që pallati im ndodhet mbi kazanin dhe dritarja ime sheh mbi kazanet. E sa e sa banorë të tjerë që i keni në video dhe foto preken nga kjo situatë që nuk është fare normale. Era e qelbur që vjen dhe mushkonjat. Po flitet kaq shumë për lirimin e hapësirave publike, por në mes të Tiranës askush nuk interesohet për këtë situatë skandaloze! Të jetosh mes plehrave në vitin 2025. Ky kryeministër të merret me këtë pjesë, meqenese kohet e fundit e ka fokusuar vëmendjen te bashkitë, por nuk i intereson fare kjo situatë skandaloze. Si është e mundur? Që plehrat të lihen kështu dhe të mblidhen njëherë në dy ditë? Kush mendon për ne si banorë në zemër të Tiranës? Ju lutem publikojeni dhe shpresoj të gjendet një zgjidhje! Më e pakta që mund të bëhet është të mblidhen çdo ditë si më parë dhe jo njëherë në dy ditë, se u qelbëm dhe u çmendem. Nuk hapim dot dritaret nga era e qelbur dhe mushkonjat. Po na vijnë plehrat deri te ballkoni. Faleminderit dhe publikojeni”
