Policia ka identifikuar autorët e zjarrvënieve në Konispol dhe Dukat.
Në Konispol u arrestua në flagrancë 25-vjeçari R.L., banues në fshatin Shalës, i cili kishte thyer masën e sigurisë “Arrest në shtëpi” dhe kishte ndezur zjarr që shkaktoi djegien e 8 hektarëve me barishte dhe shkurre në fshatin Janjar.
Një 51-vjeçar, S.I., banues në fshatin Janjar, dyshohet si bashkëpunëtor dhe po procedohet në gjendje të lirë.
Nga hetimet rezultoi se më 27 korrik 2025, rreth orës 23:30, R.L. së bashku me S.I. ndezën zjarr në një sipërfaqe kullote, duke shkaktuar dëme të mëdha në natyrë.
Ndërkohë, në Dukat, specialistët e Hetimit të Krimeve në Stacionin e Policisë Orikum kanë identifikuar një 15-vjeçar, i cili dyshohet për zjarrvënie në zonën e quajtur “Fëngu i Bozhanajve”. Zjarri ka përfshirë një sipërfaqe toke me shkurre dhe bimësi të ndryshme. Për këtë rast është ngritur procedim penal.
Materialet procedurale janë dërguar pranë Prokurorive përkatëse për veprime të mëtejshme.
