Policia e Vlorës ka identifikuar dhe shpallur në kërkim dy persona të dyshuar si autorë të atentatit me eksploziv ndaj 57-vjeçarit Mirash Gjikola, në Konispol, ngjarje e ndodhur më 5 shkurt 2026, në vendin e quajtur “Kryqëzimi i Urës së Vrinës”.
Sipas njoftimit zyrtar janë identifikuar dhe shpallur në kërkim shtetasit Griseld Taullaj, 39 vjeç dhe Xhafer Bajo, 39 vjeç, të dy banues në Sarandë.
Për ta, Gjykata e Shkallës së Parë e Juridiksionit të Përgjithshëm Sarandë ka caktuar masën e sigurisë “Arrest në burg”, për veprat penale “Vrasja me paramendim”, kryer në bashkëpunim dhe mbetur në tentativë”, si dhe “Mbajtja pa leje dhe prodhimi i armëve, armëve shpërthyese dhe municionit”.
Nga hetimet paraprake dyshohet se dy shtetasit kanë vendosur një sasi lënde plasëse në automjetin që drejtohej nga shtetasi Mirash Gjikola, 57 vjeç, me synimin për ta eliminuar fizikisht.
Policia bën me dije se në bashkëpunim me Prokurorinë po punohet edhe për identifikimin e personave të tjerë që mund të jenë përfshirë në këtë ngjarje kriminale.
