Zjarri që përfshiu një banesë në lagjen nr. 1 të Pogradecit, ku u gjet e pajetë 52-vjeçarja Kozeta Teço, po hetohet si ngjarje kriminale.
Burime nga grupi hetimor bëjnë me dije se dyshimet kryesore janë se zjarrvënia ka qenë e qëllimshme dhe se bëhet fjalë për një rast të mundshëm vrasjeje.
Fillimisht u raportua se 52-vjeçarja humbi jetën për shkak se banesa e saj u përfshi nga flakët por ekspertët mjeko-ligjorë që kanë kryer këqyrjen paraprake të trupit të viktimës kanë konstatuar shenja të jashtme dhune, çka përforcon dyshimet se ajo mund të jetë vrarë para se banesa të digjej.
Sipas hetimeve paraprake, dyshohet se gruaja është vrarë brutalisht nga Ilirjan Selmani, me të cilin raportohet në media se kishte një lidhje intime.
Burime nga policia bëjnë me dije se viktima është mbytur dhe goditur me një mjet prerës, ndërsa autori i dyshuar ka përdorur peshqirë dhe kartpeceta për të pastruar vendin e ngjarjes, të cilat janë gjetur më pas të përgjakura në një kosh mbeturinash pranë pallatit.
Për të inskenuar një aksident, Selmani dyshohet se ka ndezur disa vatra zjarri në ambiente të ndryshme të banesës, me qëllim zhdukjen e gjurmëve të krimit.
Kqyrja e kamerave të sigurisë të bizneseve përballë pallatit ku ndodhi krimi e kanë ndihmuar policinë të identifikojë dhe të shoqërojë Ilirjan Selmanin.
Autori i dyshuar është një djalë i ri, i cili shfaqet i buzëqeshur para kamerave dhe me pranga në duar. Në fund, ai iu drejtohet gazetarëve me fjalët “Nuk jam unë vrasë, jo”.
Për të dokumentuar dyshimet ndaj të riut nga Pogradeci, i cili dyshohet se ka patur një lidhje intime me viktimën, policia e ka shoqëruar nga komisariati drejt banesës ku ndodhi krimi për të kryer eksperimentin hetimor.
Autori i dyshuar i ngjarjes, pas daljes nga banesa, ka mohuar ta ketë kryer ai krimin. Policia vijon hetimet për zbardhjen e plotë të rrethanave dhe motiveve që qëndrojnë pas kësaj ngjarjeje të rëndë.
Kozeta Teço jetonte e vetme në banesë dhe në kushte të vështira ekonomike. Pasi është dhunuar për vdekje, dyshohet se i kanë vënë zjarrin banesës së saj për të humbur gjurmët. Ngjarja ndodhi rreth orës 06:00, në lagjen nr. 1 të qytetit liqenor.
- Çfarë njofton policia?
“Në vijim të informacionit të dhënë për zjarrin e rënë në lagjen nr. 1, në banesën e shtetases K. T., e cila humbi jetën, bëjmë me dije se:
Drejtoria Vendore e Policisë Korçë ngriti një grup të posaçëm hetimor, i cili në drejtimin e Prokurorisë, ka kryer një sërë veprimesh hetimore, përfshirë dhe veprime eksperimentale, për të zbardhur dhe dokumentuar rrethanat e rënies së zjarrit dhe për të përcaktuar shkakun e humbjes së jetës së shtetases K. T., 52 vjeçe.
Nga tërësia e veprimeve të kryera deri tani dyshohet se zjarri në banesën e 52-vjeçares është shkaktuar nga një shtetas.
Bazuar në provat e siguruara, shërbimet operacionale të DVP Korçë kanë shoqëruar disa shtetas, në ambientet e Komisariatit të Policisë Pogradec, ndërmjet tyre edhe autorin e dyshuar të kësaj ngjarjeje.
Veprimet hetimore vijojnë dhe në përfundim do të japim informacion të plotë në lidhje me këtë ngjarje”, bën me dije policia.
- Flet kushëriri i viktimës: Jetonte e vetme!
Sotiraq Teço, kushëriri i viktimës, ka dhënë detajet për të cilat ai është në dijeni, rreth vrasjes së 52-vjeçares në Pogradec.
“Nuk di gjë, nuk ndërhyj dot në gjëra që nuk më lejohet. Kozeta jetonte e vetme kohët e fundit. Unë kam 20 vite që kam ikur, tre ditë kam që u ktheva nga Anglia. Isha në Niçë, zbrita nga atje, u lajmëruam dhe po vijnë e familjarë të tjerë. Nuk e dija që bëhej fjalë për Kozetën, e dija sikur bëhej fjalë për motrën e madhe se ajo njëherë e ndarë. Për këtë nuk di gjë. Sa i përket kësaj ngjarje, e di shteti. Unë jam me shtetin, të japë drejtësi”, tha ai për mikrofonin e Top Channel.
“Ishte shumë njeri i mirë. Jetonte vetëm. Unë kam dalë nga banesa në orën 4:30, kam ikur në Maqedoni. Nuk pashë gjë kur ika. Tani e mora vesh. Dje ishte e motra këtu, por ajo banon në Tiranë”, është shprehur kushëriri i viktimës.
Lexo edhe:
“Nuk jam unë vrasës, jo”/ Arrestohet autori i dyshuar i vrasjes së 52-vjeçares në Pogradec (VIDEO)
