Sali Berisha, shpesh gjatë deklaratave për gazetarët pas zgjedhjeve të 11 Majit, është shprehur i prerë se nuk do të negociojë me Edi Ramën, duke e shpallur “armik” pas farsës elektorale të 11 Majit, siç e konsiderojnë demokratët.
Por, duket se Kryebashkiaku demokrat i Kavajës, Fisnik Qosja mban një qëndrim ndryshe nga PD-ja zyrtare. Teksa ishte i ftuar në Euronews Albania, Qosja tha se ka komunikim normal me Edi Ramën, ku u shpreh se për çdo shqetësim ose çështje për të mirën e qytetit komunikon me kryeministrin.
Sa i përket debatit me Ramën për legalizimet, ai tha se nuk ka pse i tregon planin e punës Ramës, megjithatë u shpreh se për çdo shqetësim ose çështje për të mirën e qytetit komunikon me Ramën.
“Nuk kam pse t’i tregoj planin e punës, por sigurisht që kam komunikim normal me kryeministrin, që të jem i sinqertë. Nëse kam një shqetësim për çështje zyrtare pune dhe për të mirën e qytetit, komunikoj dhe ai reagon. Në shumicën e rasteve ka reaguar pozitivisht. Pavarësisht se jemi kryebashkiakë të djathtë, të 5-të ne që përfaqësojmë PD-në, shkojmë në mbledhjet e Ramës me kryebashkiakët”, – tha Qosja.
Kujtojmë se në takimin me kryetarët e bashkive, Rama dhe Qosja shkëmbyen batuta gjaë bisedës për legalizimet.
“Kemi 6 vjet matje dhe janë 20 vendime legalizimesh, kështu që nuk jemi 0. S’jemi aty ku duhet, por jo 0”, i tha Qosja.
Rama iu përgjigj: “0 je, 0! Je demokrat komplet”, iu përgjigj me batutë Rama, ndërsa Qosja i tha: “Po, normalisht që demokrat jam.”
