Ministria e Sigurisë së Kinës ka hedhur alarmin për përpjekjet e agjencive të huaja të inteligjencës, të cilat sipas saj po përpiqen të bashkëpunojnë me kriminelë vendas për të vjedhur produkte të lidhura me mineralet e tokave të rralla kineze.
Në një postim në kanalin zyrtar WeChat, ministria shkruan se këto veprime përbëjnë një kërcënim serioz për sigurinë kombëtare.
“Disa vende, që nuk kanë kapacitet për prodhimin dhe rafinimin e metaleve të rralla, prej kohësh kanë grumbulluar këto burime nëpërmjet kanaleve dhe mjeteve të ndryshme për të siguruar furnizimin e brendshëm,” thuhet në postim.
Ministria jep disa shembuj të tentativave të supozuara për vjedhje, duke përmendur praktika si etiketimi i gabuar i metaleve të rralla për t’i prezantuar si jo kineze para eksportimit të tyre, falsifikimin e emrave të produkteve, dërgimin e ngarkesave të vogla me shërbime ekspres dhe ndryshimin e rrugëve të transportit.
Sipas ministrisë, agjentët e huaj kanë tentuar të fshehin materialet edhe brenda manekinëve plastikë ose shisheve të ujit. Ndërkohë sipas autoriteteve janë ndërmarrë veprime ligjore për të bllokuar këto rrjedha të paligjshme.
Mineralet e tokave të rralla kanë qenë një pikë kyçe në negociatat për tarifat doganore mes Kinës dhe Shteteve të Bashkuara, pasi SHBA-ja është e varur nga furnizimet kineze për një gamë të gjerë produktesh.
Kina kontrollon rreth 90% të prodhimit botëror të magnetëve nga tokat e rralla, të cilat janë thelbësore për sektorë si ai automobilistik, aeronautik, semikonduktorët dhe pajisjet ushtarake.
Në prill, qeveria kineze vendosi të rrisë kontrollet mbi eksportet në përgjigje të tarifave të vendosura nga administrata Trump ndaj produkteve kineze.
Pas disa raundeve të bisedimeve me amerikanët në Gjenevë dhe Londër, Kina “ka përshpejtuar procesin e rishikimit të kërkesave për licenca eksporti për produktet që lidhen me tokat e rralla,” sipas Ministrisë së Tregtisë kineze.
Eksportet kanë rifilluar dhe të dhënat doganore tregojnë një rritje prej 80% në eksportet e këtyre produkteve krahasuar me nivelet më të ulëta të pesë viteve të fundit, të regjistruara në maj.
Çështja e tokave të rralla ka tensionuar gjithashtu marrëdhëniet e Kinës me Bashkimin Evropian, i cili gjithashtu varet nga eksportet kineze për këtë kategori produktesh. Ky temë do të jetë kryesore në takimin që pritet të zhvillohet më 24 dhe 25 korrik në Pekin midis përfaqësuesve të Kinës dhe Bashkimit Evropian.
