Apeli i Gjykatës së Posaçme ka rrëzuar kërkesën e kreut të Partisë së Lirisë Ilir Meta, për zbutjen e masës së sigurisë “arrest me burg”.
Ish-presidenti Meta do vazhdojë të qëndrojë në qeli, ndërsa kreu i PL-së e ka konsideruar arrestimin e tij një proces me sfond politik.
Avokati Kujtim Cakrani deklaroi se Ilir Meta është në kushtet e persekutimit, por theksoi se ai do të përballet me të gjithë dhe se nuk mposhtet kollaj.
“Presidenti ka 9 muaj në paraburgim, është e paprecedentë që Presidenti i Republikës të qëndrojë 9 muaj në paraburgim pa përfunduar hetimet. Po mbahet në kushtet e një persekutimi politik, ju e dini mirë se çfarë po heq ai sot në paraburgim ku i janë mohuar të drejtat elementare siç janë ato e ushtrimit të telefonatave me kolegët, apo anëtarët e Kryesisë apo familjes së tij. Meta është aty do të përballet me të gjithë, është një individ që nuk mposhtet kollaj. Meta do të vazhdojë të përballet me këta”, tha Cakrani.
Meta u arrestua më 21 tetor 2024 dhe po hetohet nga SPAK nën dyshimet për një seri veprash penale të kryera në bashkëpunim me ish-bashkëshorten e tij, deputeten Monika Kryemadhi dhe zyrtarë të tjerë.
Sipas SPAK, ata dyshohet se kanë përdorur funksionet shtetërore për të favorizuar kompani private, për lobime të dyshimta në SHBA dhe për fshehje pasurie përmes transaksioneve të patundshmërive.
Kryemadhi po hetohet për “pastrim parash”, “korrupsion” dhe “mosdeklarim të pasurisë”, por ndaj saj është caktuar masa më e lehtë “detyrim paraqitjeje”. E njëjta masë është lënë edhe për Ema Çokun, e dyshuar për pastrim parash, dhe Piro Xhixhon, për korrupsion pasiv.
Meta ndërkohë mbetet i vetmi nën masën e “arrestit në burg”, për të cilin tashmë kërkon shqyrtim nga Kushtetuesja.
