Kreu i PD, Sali Berisha denoncon Paketën e Maleve të Edi Ramës si një mjet për të nxitur gjakderdhje, armiqësi, urrejtje dhe përçarje në veri.
Ai thekson se kjo paketë mbështetet në një paligjshmëri absolute, ku Rama autorizon veten të marrë dhe të dhurojë toka që nuk i përkasin, duke shkelur traditën e ndarjes së tokës sipas trashëgimisë në veri.
Berisha fton qytetarët të mbrojnë me vendosmëri të drejtën e pronësisë dhe paralajmëron se qeveria mund të dërgojë skuadra të dyshimta për të grabitur tokat malore, duke kërkuar nga banorët të mos shesin asnjë metër katror toka ndaj personave me origjinë apo qëllime të paqarta.
“Pas Paketës së Maleve qendron një paligjshmëri absolute sepse Edi Rama autorizon veten të marrë tokat dhe të bëjë dhuratë tokat atyre që nuk mund t’i disponojnë kurrë tokat e tyre. Veriu ka ndarë tokën sipas trashëgimisë dhe nuk kanë marrë asnjë pëllëmbë tokë nga tjetri.
Çdo përpjekje për të rrëmbyer pronë private në veri është një përpjekje për të nxitur gjakderdhje, për të nxitur armiqësi, urrejtje dhe përçarje.
Në Paketën e Maleve, Edi Rama autorizon veten sikur të ishte pronar i maleve dhe alpeve dhe zonave të tjera.
Ndaj dhe unë ftoj çdo qytetar t’i përmbahet me rigorozitet të madh respektimit të të drejtës së pronësisë në çdo zonë dhe kudo.
Nga ana tjetër jam i sigurt se Edi Rama do ndërsejë skuadrat e tij të trafikantëve drejt zonave malore. U bëj thirrje qytetarëve, asnjë metër katror tokë mos u shisni njerëzve të dyshimtë, njerëzve me para të pista apo me origjinë të paqartë”, tha Berisha.
