Adriatik Lapaj ka bërë një reagim të ashpër ndaj bashkëpunëtorit të tij në koalicionin “Nisma Shqipëria Bëhet”, Endri Shabani, për faktin se daja i këtij të fundit, Zeqir Kordhoni i dërgoi një shkresë kreut të KQZ-së Ilirjan Celibashi, ku kërkon që të marrë mandatin e vetëm të fituar nga ky koalicion më 11 Maj.
Në një postim në rrjetet sociale, Lapaj akuzon indirekt se pas kësaj kërkese të Zeqir Kordhonit qëndron nipi i tij, Endri Shabani, për të cilin thotë se i shtriu dorën e bashkëpunimit.
Lapaj thotë se po i bëhet padrejtësi dhe i çon mesazh Shabanit se nëse do që të mbahet mend kështu, atëhere i shkoftë mbarë bashkë me dajën.
Sipas tij, është një popull i tërë dëshmitar se Endri Shabani u angazhua për hapjen e listave dhe doli garant për familjarët e vetë, ndërsa shton se populli do ta gjykojë.
Reagimi i plotë:
“Është angazhuar gjithë këneta si e si të mos shkoj unë në Kuvend. Po sa tmerr më keni?! O të mjerë, unë nuk pranoj shantazh e as shitem.
Zeqiri (dajo i Endrit) dhe nipi i tij Endri Shabani të cilit i shtriva dorën e bashkimit nuk do marrin asnjë mandat. Qameti do ndalojnë mua të shkoj në Parlament.
Është një popull i tërë dëshmitar se Endri Shabani u angazhua për hapjen e listave dhe doli garant për familjarët e vetë.
Nëse Endri Shabani do të mbahet mend kështu në jetën publike, mbarë u shkoftë bashkë me dajon!
Jam krenar që u luftova nga çdo anë dhe nuk u ndala! U luftova nga Rama, Saliu dhe këta “të rinjtë”, deri dhe te ky që e futa në gji…nga të gjithë.
Ndaj meje dhe krejt ekipit të Lëvizjes Shqipëria Bëhet po konsumohet publikisht PADREJTËSI!
Populli do gjykojë.” – shkruan Adriatik Lapaj.
Kujtojmë se në zgjedhjet parlamentare të 11 Majit, “Nisma Shqipëria Bëhet” përbehej nga tre parti, ku dy më kryesoret ishin “Shqipëria Bëhet” e Adriatik Lapajt dhe “Nisma Thurje” e Endrit Shabanit. Ata u futën në zgjedhje me lista të hapura praktikisht, ku në listën e mbyllur vendosën emra fiktivë dhe mandatet do t’i merrnin kandidatët më të votuar nga lista e hapur.
Gjithsesi, më lart e theksuam prakisht, pasi pavarësisht se kandidatët e listës së mbyllur kanë dhënë dorëheqje formale, ata sërish e kanë të drejtën për të kërkuar mandatin siç po ndodh dhe me rastin e Zeqir Kordhonit.
Aktualisht, fituese e mandatit të koalicionit “Nisma Shqipëria Bëhet” në Tiranë është Ana Dajko, ndërsa më i votuari nga lista e hapur është Adriatik Lapaj. Që ai të hyjë në parlament, duhet që Ana Dajko dhe 11 të tjerët e listës së mbyllur të refuzojnë mandatin, në mënyrë që karrigen e Kuvendit ta zërë lideri i koalicionit.
Ndërkohë, Zeqir Kordhoni është i renditur i 9-ti në listën e Tiranës, si kandidat i “Nisma Thurje” dhe sipas CV-së së tij, ai është një punëtor ndërtimi dhe një invalid që trajtohet me KEMP.
Edhe pse ka dorëzuar një dorëheqje formale në KQZ më 11 Maj, Kordhoni i është drejtuar me një shkresë Ilirjan Celibashit, ku kërkon të verifikojë përmbajtjen e shkresë ku ka dhënë dorëheqjen, duke thënë se nuk mban mend se çfarë është firmosur.
Zeqir Kordhoni, i datëlindjes 22 Shtator të 1967, është daja i Endrit Shabanit (Vëllai i të ëmës).
Daja i Shabanit nuk heq dorë nga mandati, letër Celibashit: Dua të ushtroj funksionin e deputetit
