Zeqir Kordhoni, daja i Endrit Shabanit, duket se nuk ka ndërmend të heqë dorë nga marrja e mandatit të vetëm të deputetit, të fituar nga koalicioni “Nisma Shqipëria “Bëhet” më 11 Maj në Qarkun e Tiranës.
Zeqir Kordhoni i është drejtuar Komisionerit Shtetëror të Zgjedhjeve, Ilirjan Celibashi, përmes një shkrese që mban datën 15 Korrik, ku i kërkon që të ushtrojë mandatin e deputetit, nëse shpallet fitues, dhe se KQZ të injorojë çdo deklaratë të tij të mëparshme apo të koalicionit “Nisma Shqipëria Bëhet”.
“Une, I nenshkruari Zeqir Kordhoni kam kandiduar per Koalicionin “Nisma Shqiperia Behet” ne qarkun e Tiranes ne zgjedhjet parlamentare te dates 11 Maj 2025.
Permes kesaj deklarate te nenshkruar perpara noterit sot, me date 15/07/2025, dua te ve ne dijeni Komisionin Qendror te Zgjedhjeve, vullnetin tim te plote per te ushtruar funksionin e deputetit ne rast se shpallem fitues, pas shperndarjes se mandateve ne perputhje me rregullat e percaktuara nga Kodi Zgjedhor i Republikes se Shqiperise.
Ne kete kuader, kerkoj qe KQZ te injoroje cdo deklarate tjeter te depozituar me pare nga Koalicioni “Nisma Shqiperia Behet” ose ne emrin tim dhe te marre ne konsiderate vetem kete deklarate si shprehje te qarte dhe te vlefshme te vullnetit tim”, – thuhet në letrën e depozituar në KQZ.
Nga vendosmëria e Zeqir Kordhonit, dajës së Endrit Shabanit, duket se do të mbetet jashtë Kuvendit Adriatik Lapaj, i cili rezultoi më i votuari në listën e hapur të koalicionit.
Kujtojmë se në zgjedhjet parlamentare të 11 Majit, “Nisma Shqipëria Bëhet” përbehej nga tre parti, ku dy më kryesoret ishin “Shqipëria Bëhet” e Adriatik Lapajt dhe “Nisma Thurje” e Endrit Shabanit. Ata u futën në zgjedhje me lista të hapura praktikisht, ku në listën e mbyllur vendosën emra fiktivë dhe mandatet do t’i merrnin kandidatët më të votuar nga lista e hapur.
Gjithsesi, më lart e theksuam prakisht, pasi pavarësisht se kandidatët e listës së mbyllur kanë dhënë dorëheqje formale, ata sërish e kanë të drejtën për të kërkuar mandatin siç po ndodh dhe me rastin e Zeqir Kordhonit.
Aktualisht, fituese e mandatit të koalicionit “Nisma Shqipëria Bëhet” në Tiranë është Ana Dajko, ndërsa më i votuari nga lista e hapur është Adriatik Lapaj. Që ai të hyjë në parlament, duhet që Ana Dajko dhe 11 të tjerët e listës së mbyllur të refuzojnë mandatin, në mënyrë që karrigen e Kuvendit ta zërë lideri i koalicionit.
Ndërkohë, Zeqir Kordhoni është i renditur i 9-ti në listën e Tiranës, si kandidat i “Nisma Thurje” dhe sipas CV-së së tij, ai është një punëtor ndërtimi dhe një invalid që trajtohet me KEMP.
Edhe pse ka dorëzuar një dorëheqje formale në KQZ më 11 Maj, Kordhoni i është drejtuar me një shkresë Ilirjan Celibashit, ku kërkon të verifikojë përmbajtjen e shkresë ku ka dhënë dorëheqjen, duke thënë se nuk mban mend se çfarë është firmosur.
Zeqir Kordhoni, i datëlindjes 22 Shtator të 1967, është daja i Endrit Shabanit (Vëllai i të ëmës).
