Këtë të mërkurë pritet të ndërmerret një ndër vendimet më të rëndësishme në procesin gjyqësor ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi.
Trupi gjykues në çështjen “Thaçi dhe të tjerët” ka caktuar datën 16 korrik për të shpallur vendimin lidhur me mocionin e paraqitur nga ekipet e mbrojtjes, që kërkon rrëzimin e disa pikave të aktakuzës për krime lufte dhe krime kundër njerëzimit. Ky vendim pritet të ketë ndikim të drejtpërdrejtë në ecurinë e mëtejme të gjykimit, i cili tashmë ka hyrë në fazën përfundimtare.
Seanca do të nisë në orën 09:00, ndërsa gjatë ditës pritet të vijojë me dëgjimin e dëshmitarëve ekspertë të Zyrës së Mbrojtësit të Viktimave. Gjykata ka urdhëruar që ekspertët të jenë të gatshëm pavarësisht vendimit për mocionin, pasi natyra e tij, sipas gjyqtarit Charles Smith, është e kufizuar dhe procesi gjyqësor do të kalojë në fazën tjetër.
Avokati Taulant Hodaj ka theksuar rëndësinë e kësaj faze, duke e cilësuar si një “filtër” që mund të përcaktojë rrjedhën e mëtejshme të procesit. “Nëse aktakuza është e dobët në bazë të provave të paraqitura nga prokuroria, gjykata mund të rrëzojë disa pika të saj. Por po ashtu mund të vendosë që të mos rrëzojë asnjë ose të vazhdojë me të gjitha”, ka deklaruar ai. Sipas Hodajt, një vendim për rrëzimin e disa pikave do të ndikonte edhe në vendimin përfundimtar, i cili pritet në fund të këtij viti ose në fillim të 2026-ës.
Ndërkohë, Gjykata Speciale ka dhënë vendimin përfundimtar në rastin e Salih Mustafës, duke konfirmuar aktgjykimin e Apelit me dënim prej 15 vjetësh burg. Në rastin e Pjetër Shalës, Gjykata e Apelit ka ulur dënimin nga 18 në 13 vjet, ndërsa palët mund të paraqesin ankesa për mbrojtjen e ligjshmërisë në Gjykatën Supreme.
Përfaqësuesja e Institutit të Kosovës për Drejtësi, Blendina Veliqi, sqaron se në këtë fazë nuk bëhet vlerësimi i provave, por mund të parashtrohen pretendime për shkelje të ligjit, të cilat nëse pranohen, mund të çojnë në rishqyrtim ose ndryshim të vendimit.
